Më mirë vetëm se sa të shoqëruar. Një mundësi e udhëtimeve janë pushimet e kaluara vetëm për vetëm. Kjo duket se është bërë një zgjedhje e cila nuk i përket më vetëm njerëzve me shpirt të lirë dhe atyre që duan t’i bien botës rreth e rrotull në zbulim të vendeve të reja dhe eksperiencave të paharrueshme.
Ajo që deri para pak kohësh është dukur diçka e çuditshme dhe e mërzitshme tashmë është kthyer në një tendencë. Ndërkohë një studim ka konfirmuar edhe përfitimet e të udhëtuarit pa shoqërinë e askujt.
“I vetmi udhëtim i vërtetë drejt zbulimit nuk konsiston në kërkimin e vendeve të reja, por në të pasurin e syve të rinj, thoshte Prusti.
E ky udhëtar vetmitar e di mirë këtë gjë. Eksplorimi vetëm i vendeve të reja është mënyra më e mirë për të njohur një vend, një popull, një kontinent.
Të udhëtosh vetëm do të thotë të forcosh vetëbesimin dhe aftësinë e të kuptuarit të gjërave, mendimet bëhen më freksibile dhe mendja më e lirë.
Me këtë shpirt, shumë të rinjë dhe jo vetëm kanë nisur të udhëtojnë nga një cep i botës në tjetrin, ndërsa shumë prej tyre kanë dashur të ndajnë eksperiencën e tyre online.
“Të udhëtuarit vetëm i ndihmon personat që të rrisin ndjesinë e të pasurit kontroll më të madh mbi jetën e tyre dhe veprimet që ata ndërmarrin dhe jo vetëm kaq. Kjo gjë stimulon edhe reflektimin dhe ju ndihmon në zbulimin e vetvetes”, thotë profesoresha italiane Constanza Bianchi nga Queensland University of Technology, raporton shqip.
Studimi ka konfirmuar avantazhet, edhe ato psikologjike, të këtyre lloj pushimeve. “Kjo është mënyra më e mirë për të punuar me vetveten”, vazhdon më tej znj. Bianchi.
Studimi i publikuar në revistën “International Journal of Travel and Tourism Research”, u krye në një kampion prej 24 pjesëmarrësish të sapo kthyer nga një pushim të vetmuar prej pothuajse nëntë ditësh.
Pjesa më e madhe e njerëzve të intervistuar, zgjodhi të udhëtonte pa asnjë familjar, mik ose të afërm dhe të gjithë në rikthim ndjeheshin të kënaqur.
Të ndjekësh ritmet vetjake pa iu përshtatur atyre të të tjerëve, të rizbulosh një ndjesi të re lirie, të shijosh një relaks total pa ankthin për të planifikuar një zhvendosje në grup, të përjetosh eksperienca të reja, të njohësh njerëz të rinjë dhe të vendosësh totalisht vetë se çfarë dëshiron apo jo të bësh…
Këto janë disa nga avantazhet e listuara nga udhëtarët e vetmuar. Thuajse për të gjithë i rëndësishëm është udhëtimi dhe jo të qenit të shoqëruar nga dikush./a.k
