Tregu bankar dhe i karburanteve do të jenë objekt i hetimit të Autoritetit të Konkurrencës për këtë vit. Kërkesa për hetim i këtyre tregjeve u bë dje nga deputetët e maxhorancës në seancën e prezantimit të raportit vjetor të Autoritetit të Konkurrencës. Deputeti i Partisë Socialiste, Ervin Bushati, shpjegoi në Komisionin e Ekonomisë se në 2016-n te karburantet konkurrenca e dobët erdhi për shkak të cilësisë dhe sigurisë së tregut.
Ndërsa hetimi i përgjithshëm për bankat në 2016-n konstatoi kushtet e një situate monopoli, por Konkurrenca nuk ka marrë ende vendim.
“Problematika në cilësinë e karburanteve dhe të sigurisë së peshëmatjes ka bërë që konkurrenca mes firmave të jetë e dobët. Kurse çmimi i shitjes së nivelit me pakicë është më pak dominues sesa niveli i shitjes me shumicë, duke mos reflektuar çmimin e blerjes. Në lidhje me hetimin e përgjithshëm në sektorin bankar, ka rezultuar se konkurrenca në sektorin bankar është në kushtet e konkurrencës monopolistike, por Komisioni i Konkurrencës është në proces konsultimi dhe nuk është shprehur ende me vendim”, u shpreh Bushati.
Për shkak të kësaj situate, Komisioni i Ekonomisë i kërkoi Autoritetit të Konkurrencës që për këtë vit të vazhdohen hetimet në tregjet e karburanteve dhe tregut bankar, me qëllim përmirësimin e konkurrencës.
“Rekomandojmë për vitin 2017 të vazhdojë monitorimi i tregjeve të karburanteve, për të siguruar që sjellja e sipërmarrjeve në këtë treg nuk bie ndesh me ligjin e konkurrencës. Të adresohen rekomandimet e nevojshme në lidhje me hetimin e përgjithshëm në sektorin bankar për përmirësimin e mjedisit konkurrues”, u shpreh deputeti Bushati. Kryetarja e Autoritetit të Konkurrencës, Juliana Latifi, tha se janë zhvilluar hetime për 7 tregje, por që nga këto hetime nuk ka rezultuar situatë monopoli.
“Në vitin 2016 monitoruam tregun bankar, sigurimet, farmaceutikën, tenderat për sinjalistikën rrugore, duhanin për eksport, përpunimin e qumështit dhe furnizimin me karburant të Aeroportit të Rinasit.
Nga një këndvështrim institucional, fundi i vitit 2016 përkon me zgjedhjen time nga ana e Kuvendit si kryetare e re e Autoritetit të Konkurrencës. Për këtë qëllim, në axhendën e Autoritetit për vitin 2017 janë përfshirë një sërë objektivash për të rritur kapacitetin analizues dhe penalizues të tregjeve”, u shpreh Latifi.
ma.me
