Ministria e Ekologjisë dhe Mjedisit njoftoi se Kina ka krijuar rrjetin më të madh të monitorimit ekologjik dhe mjedisor në botë të mbështetur nga teknologji të përparuara, i cili do të ndihmojë në forcimin e efikasitetit të zbatimit të ligjeve mjedisore, shkruan “China Daily”.
Ministri i Ekologjisë dhe Mjedisit, Huang Runqiu, deklaroi se numri i stacioneve të monitorimit që ministria mbikëqyr drejtpërdrejt në të gjithë vendin është mbi 33.000.
Sipas tij, këto objekte mbulojnë të gjitha qytetet në nivel prefekture dhe më lart, pellgjet kryesore të lumenjve dhe zonat detare, duke monitoruar një gamë të gjerë elementësh, përfshirë ujin, ajrin, tokën, zhurmën, oqeanet dhe ekosistemet.
Ministri gjithashtu vuri në dukje përparime të rëndësishme në bërjen e rrjetit të monitorimit më digjital dhe inteligjent, duke integruar teknologji të përparuara si të dhënat e mëdha, inteligjenca artificiale dhe “cloud computing”.
Ai theksoi se ministria duhet t’i kalojë metodat e saj kryesore të marrjes së mostrave, analizës, funksionimit dhe mirëmbajtjes në monitorimin mjedisor nga përdorimi manual në të automatizuar, dixhital dhe inteligjent.
Sipas ministrit, vendi ka arritur automatizim të plotë të procesit në procedurat e monitorimit mjedisor, siç janë marrja e mostrave, dorëzimi i tyre dhe testimi analitik.
Ai zbuloi se transformimi inteligjent është zhvilluar në 143 stacione automatike të monitorimit të ajrit në rajonin Pekin-Tianjin-Hebei.
Ministri Huang theksoi përdorimin me shpejtësi të përshpejtuar të inteligjencës artificiale në monitorimin mjedisor.
