Deputetja e LSI-së, Monika Kryemadhi, duke folur në Konferencën Vjetore të Grave Parlamentare, ka deklaruar se, procesi i arritjes së barazisë gjinore në Shqipëri është ende mbrapa.
“Me gjithë një seri ndryshimesh në kërkim të barazisë gjinore, inferioriteti i gruas në planin ekonomik, por sidomos civil, është i ndjeshëm dhe përjashton figurën e saj nga një sërë të drejtash e aktivitetesh politike të cilat e motivojnë atë për arsye të paqëna, si inferioriteti fizik apo roli i paracaktuar që gruaja duhet të ketë për të qenë nënë dhe shtëpiake”, ka thënë Kryemadhi.
Sipas saj, vendi ynë e reflekton këtë lloj problematike dhe megjithëse sot mund të shihet një numër në rritje i grave në karrierë, numri i tyre është shumë herë më i ulët sesa ai i burrave.
“Në fakt, ende konstatohet se figura e gruas që punon e pavarur në planin ekonomik dhe social nuk është përhapur në mënyrë simetrike në të tërë territorin e vendit tonë”, ka thënë Kryemadhi.
Sipas saj, traditat kulturore dhe sociale në vend kanë bërë që burrat të jenë më të privilegjuar në disa fusha, krahasuar me gratë.
“Dhe kjo vetëm për faktin se grave nuk u është dhënë mundësia për të konkurruar dhe për të qenë pjesë e këtyre aktivitetesh”, ka thënë Kryemadhi.
