Nuk ka fund telenovela e transferimit të dështuar të Luka Modriç tek Interi, edhe pse në fakt me mbylljen e merkatos dukej se palët i kishin dhënë përfundimisht lamtumirën njëra-tjetrës.
Yllit kroat duket se nuk i kanë pëlqyer aq shumë lajmet që kanë dalë në mediat italiane rreth një deklarate të tij, saqë nuk ka ngurruar të përgënjeshtrojë nëpërmjet rrjeteve sociale.
Faqja në Instagram “Futbal Al Reves” kishte shkruar lajmin se mediat italiane publikonin fjalët e Modriç para FIFA-s që shfajësonin zikaltërit.
Sipas lajmit në Itali, Modriç kishte deklaruar se kishte qenë ai që kishte kontaktuar Interin dhe jo e kundërta.
Por kroati, po nëpërmjet Instagramit, nuk ka ngurruar të lërë një koment të tijin te ky postim, duke tërhequr vëmendjen e mijëra tifozëve.
“Kjo është gënjeshtra më e madhe në histori”, ishin fjalët e Modriç, duke përgënjeshtruar kësisoj se kishte qenë ai që kishte kërkuar zikaltërit.
Sigurisht që këto fjalë nuk do të lumturojnë aq shumë Interin, duke llogaritur se shumë shpejt mund të përballen me sanksione nga FIFA meqë kanë kontaktuar lojtarin që është nën kontratë me Realin./a.ç
