Ministria e Mirëqenies Sociale dhe Rinisë njoftoi sot se ka shkarkuar nga detyra Armelin Ҫili, si drejtor i shkollës së mesme profesionale “Kristo Isak”. Ky shkarkim erdhi, pasi Çili rezultoi i dënuar më parë nga gjykata.
MMSR bëri me dije se ministri Blendi Klosi pasi u njoh me problematikën në lidhje me emërimin e Armelin Ҫili si Drejtor i Shkollës së Mesme Profesionale “Kristo Isak” Berat, urdhëroi verfikimin e dosjes dhe procedurave të ndjekura për këtë emërim si dhe kërkoi informacion nga instancat përkatëse.
Nga verifikimi i kryer rezultoi se Ҫili rezulton i emëruar me konkurs të hapur në bazë të legjislacionit në fuqi. Pjesë e dosjes së aplikimit është edhe vërtetimi i gjendjes gjyqësore ku Ҫili rezulton i padënuar.
Pasi MMSR u njoh me vendimin e gjykatës për Ҫilin, informacion i padeklaruar gjatë konkursit të zhvilluar, i kërkoi Ҫilit dorëheqjen nga detyra. Pavarësisht faktit që dënimi i mëparshëm i Ҫilit tashmë është i parashkruar, vepra penale për të cilën është dënuar bie ndesh me parimet dhe me etikën e MMSR-së, ku i kushtohet rëndësi të veçantë pastërtisë së figurës morale.
Duke filluar nga data 15.09.2015 Amelin Ҫili nuk do të jetë më në detyrën e Drejtorit te Shkollës së Mesme Profesionale “ Kristo Isak”, Berat.
