Barbulle Pepa pas 100 vitesh është harruar nga të gjithë, të afërmit, miqtë, por mbi të gjitha edhe nga shteti, që pak ditë më parë i ndërpreu furnizimin me energji elektrike për shkak se nuk kishte shlyer detyrimet.
E moshuara, që duhet të gëzonte respekt për 100 vitet që ka mbi supe dhe kontributin që ka dhënë shprehet se të ardhurat e vetme që ka janë 7 mijë Lekë pension dhe nuk ka mundësi që të paguajë energjinë.
Ajo jeton e vetme në kushte ekstreme ekonomike në një dhomë, e cila vetëm emrin ka të tillë pasi nuk ka asnjë kusht që aty të mund të jetojnë njerëz. Kjo banesë e cila më shumë i përafrohet një stalle bagëtish ndodhet në Fang të Mirditës shumë pranë Rrugës së Kombit.
Të vetmit që i bëjnë shoqëri të moshuarës janë macja dhe dy bagëti të imta, pasi vajza e vetme që ajo ka është e martuar dhe jeton në Tiranë.
Shteti është kujtuar për këtë grua vetëm për t’i ndërprerë energjinë elektrike, e cila mungon në këtë banesë prej mëse dy muajsh.
Mes lotësh në sy e moshuara tregon se në shumë raste i ka munguar edhe buka e gojës për ditë të tëra, ndërsa të vetmit që janë kujdesur për ta kanë qenë fqinjët. Ajo apelon për ndihmë, pasi në këto kushte e ka të pamundur që të jetojë.
Ky është realiteti i hidhur i kësaj të moshuare e cila sot po vuan për bukën e gojës… Apeli i saj për ndihmë i drejtohet çdo kujt.
