Mjeku shqiptar Shpëtim Baci i cili punon në qytetin e Parmës në një spital privat të Italisë, ka qenë në një lidhje direkte me edicionin e lajmeve në Ora News. Ai ka treguar histori me disa pacientë shqiptarë që kanë qenë të infektuar, të shtruar në spital apo që kanë humbur jetën nga koronavirusi.
“Ka patur të infektuar, të shtruar në spital dhe humbje jete. I jap ngushëllime të sinqerta të gjithë shqiptarëve që kanë humbur njerëzit e tyre kudo që ndodhen. Numrin tim e kanë të gjithë shqiptarët që jetojnë në Parma dhe me të gjitha unë kam pasur kontakt.
Për fat të keq kisha një djalë nga Lushnja që më mori në telefon më tha “Dr. Baci kam gruan të shëruar dhe nuk e di si është gjendja”. Ishte 40 vjeç dhe humbi jetën, me dy fëmijë të mrekullueshëm.
Një grua tjetër shqiptare që e kam pasur paciente edhe vitet e kaluara me shumë patologji nga një zonë e Durrësit, 64 vjeç. Kam patur një grua nga Kavaja që e kaloi shumë mirë infektimin. Kam patur një infermier nga Tirana që punon me mua, edhe ai e kaloi në mënyrë fantastike. E shumë të tjerë më kanë marrë në telefon për këshilla. Por për fat të keq ka patur dhe shumë shqiptarë që kanë humbur jetën nga COVID-19”, përfundon mjeku.
Ai ka folur për eksperiencën e tij gjatë kësaj kohë dhe vështirësitë më të mëdha që ai ka hasur gjatë pandemisë.
“Nuk kishim të dhënat e duhura, nuk dinim asgjë. Ditët e para u ndodhëm shumë në vështirësi. Kishte shumë të sëmurë brenda një ditë dhe shumë mjek të familjes të sëmurë. Patëm 20 mjekë, infermierë dhe personal të shendetit të sëmurë me COVID-19 në repatin tonë të spitalit.
Vështirësia më e madhë ishte ta kuptonim këtë sëmundje që në fazën e parë. Nuk kishim as shtretër të mjaftueshëm për të kuruar aq shumë pacientë që vinin.
Në fillim unë dhe kolegët e mi vinim me frikë në spital, punonim pa asnjë ditë pushim, të shtunë, të diel, të hënë etj. Me ilaçet që filluam të përdonim kishim shumë pak njohuri”, shprehet mjeku shqiptar.
g.kosovari
