Një vajzë pesëvjeçare ka ndërruar jetë pasi mjekja refuzoi ta pranojë për një kontroll.
Ellie-May Clark dhe nënës së saj i është thënë se ishin vonuar për kontroll dhe se duhet të kthehen të nesërmen të njëjtën kohë, por pesë orë më vonë, vajza ka ndërruar jetë nga sulmi i astmës.
Mjekja ka refuzuar të komentojë rastin, derisa familja e vajzës është duke kërkuar të fillojnë hetimet.
Ellie-May dhe nëna e saj ishin vonuar disa minuta në takimin e rezervuar ditë më parë për një kontroll, pretendon gjyshja e saj. Po ashtu, nëna e vogëlushes kishte paralajmëruar paraprakisht mjekët se mund të vonoheshin për disa minuta.
Por mjekja Joanne Rowe nuk i kishte pranuar. Dhe ky vendim sipas gjyshes së vogëlushes, i kushtoi me jetë mbesës së saj.
Ellie-May vuante nga astma dhe mbi pesë herë ishte shtruar në spital. Por edhe pse mjekja ishte paralajmëruar se vogëlushja vuan nga astma që po i rrezikon jetën, mjekja nuk e kishte pranuar.
Atë ditë Ellie-May nuk ndihej mirë në shkollë, dhe për këtë arsye ishte lejuar më herët të shkojë në shtëpi. Ndërkaq nëna e saj kishte caktuar vizitën për orën 17:00, kurse në spital ishte paraqitur në orën 17:04.
Dhe pasi që nuk ishin pranuar nga mjekja, Ellie-May dhe nëna e saj ishin kthyer në shtëpi, kurse telefonatën drejtuar ndihmës së shpejtë e kishin realizuar në orën 22:35 kur Ellie-May pësoi sulm, ku si pasojë mbeti pa frymë. Për fat të keq mjekët nuk arritën ta shpëtojnë.
Lidhur me rastin nëna e të ndjerës nuk ka mundur të bisedojë me gazetarët, por këtë gjë e ka bërë gjyshja.
“Po ndihemi tmerrësisht keq. Mendoj se mjekja Rouwe duhet të përfundojë në burg. Nuk po mund ta besoj se si ky rast nuk i ka bërë farë përshtypje. Ajo madje as nuk na ka kërkuar falje”, ka deklaruar gjyshja e të ndjerës Ellie-May.
Mjekja Rouwe ushtron detyrën e pediatres mbi 22 vite, kurse hetimet rreth këtij rasti kanë konstatuar se ajo nuk e kishte marrë parasysh historinë e sëmundjes së vogëlushes. Ajo kishte pretenduar se në ato momente kishte qenë duke u marrë me pacientë tjerë, por hetimet e kanë dëshmuar të kundërtën. /a.m.
