Grupit të mjekëve që kërkon të protestojë nesër para QSUT, i është përgjigjur shefi i ekzekutivit.
Edi Rama i ka ftuar bluzat e bardha për një takim të enjten në 09:00 në zyrën e tij.
Sindikata e mjekëve ka hartuar një shkresë me 4 kërkesa. Një nga kërkesat e tyre është që të shpallen dëshmorë mjekët që humbën jetë gjatë përballjes me pandeminë e koronavirusit.
Mjekët kanë kërkuar gjithashtu rritje të vlerësueshme të trajtimit financiar të personelit.
“Dëshirojmë rritje të vlerësueshme të trajtimit financiar të personelit shëndetësor. Të bëhet sigurimi i jetës së personelit shëndetëso. T’i sigurohen të gjitha kushtet personelit”, thuhet në kërkesat e mjekëve drejtuar qeverisë.
Nga ana tjetër, tubimit të mjekëve iu përgjigj negativisht Policia e Tiranës. Për ironi, kjo e fundit i kujtonte mjekët në fjalë se nuk mund të grumbullohen për shkak të pandemisë.
