Pamje të pazakonta janë regjistruar mëngjesin e kësaj të premteje në aksin rrugor Kukës–Krumë, ku një mjegull e dendur ka mbuluar zonën, duke përfshirë edhe Liqenin e Fierzës. Tisi i bardhë që shtrihet mbi sipërfaqen e ujit ka krijuar një panoramë mbresëlënëse, një fenomen jo i zakonshëm për mesin e muajit korrik.
Mjegulla është krijuar si pasojë e ndërthurjes së temperaturave të larta me rritjen e lagështisë në ajër. Gjatë dy ditëve të fundit, Kukësi dhe Hasi është përfshirë nga reshje të dendura shiu në orët e pasdites, duke krijuar kushtet ideale për formimin e këtij fenomeni meteorologjik.
Megjithëse mjegulla ka kufizuar përkohësisht dukshmërinë në disa segmente të rrugës, ajo nuk ka sjellë probleme në qarkullimin e mjeteve përgjatë aksit Kukës-Krumë. Fenomeni është kalimtar dhe të shpërndahet gradualisht me rritjen e temperaturave gjatë orëve të paradites.
