Qeveria e koalicionit PS-Lsi e drejtuar nga Edi Rama ka mbajtur deri në tani vetëm katër nga 27 premtimet e bëra në dy vitet e saj të drejtimit të vendit. Lëvizja “Mjaft” prezantoi dje raportin e saj për punën e qeverisë në 29 muaj, shkruan Gazeta Shqiptare. Sipas këtij raporti, mbeten ende të parealizuara premtime si ai për hapjen e 300 mijë vendeve të reja të punës, shërbimi shëndetësor falas, goditja e të korruptuarve si dhe reforma në drejtësi.
Përfaqësuesi i kësaj lëvizjeje, Aldo Merkoçi, deklaroi dje gjatë prezantimit se sa i përket premtimit për hapjen e 300 mijë vendeve të reja të punës, “ajo çfarë ka ndodhur nga vrojtimet ka qenë fakti që e para, papunësia në vend në 3-mujorin e dytë të këtij viti është 17.3%, pra pa ndryshuar nga ajo e vitit pararendës”. Në 4 premtimet që kjo qeveri ka mbajtur bëjnë pjesë rimbursimi i TVSH-së, normalizimi i sektorit të energjisë elektrike, hartimi i një ligji për energjinë dhe futja e teknologjisë në pagesën e taksave.
Raporti i “Mjaft” u referohet deklaratave publike të Partisë Socialiste, por edhe angazhimeve të marra në Kuvendin e Shqipërisë nëpërmjet nismave ligjore. Dhe prej këtyre kanë rezultuar rreth 27 premtime të qeverisë, nga të cilat 4 rezultojnë të realizuara në përputhje me premtimin, 10 premtime vlerësohen si të realizuara pjesshëm, 1 premtim konsiderohet si i pamatshëm dhe 12 premtime konsiderohen të parealizuara.
PREMTIMET E REALIZUARA
- Rimbursimi në kohë i TVSH-së.
- Normalizimin e sistemit të energjisë, shlyerjen e borxheve në këtë sektor, rimëkëmbjen e operatorëve që operojnë në
të.
- Qeveria ka premtuar hartimin dhe zbatimin sa më shpejt të një ligji të ri për energjinë.
- Përdorim i teknologjisë së informacionit për të gjitha llojet e tatimeve dhe taksave në vend.
PREMTIMET PJESËRISHT TË REALIZUARA
- Shlyerja e të gjitha detyrimeve të
prapambetura ndaj biznesit, të krijuara nga
qeveria “Berisha” brenda 9-mujorit të parë të
qeverisjes.
- Nuk do të krijohet asnjë borxh i ri.
- Formalizimi i ekonomisë.
- Produktet “Made in Albania”, eliminimi i barrierave fiskale për importin.
- Mbyllja e procesit të legalizimeve të ndërtimeve pa leje.
- Dëmshpërblimi i ish-të përndjekurve politikë.
- Investime në rrjetin e transmetimit në mbështetje të modelit tonë të ri ekonomik.
- Përmirësimi i situatës në sektorin e turizmit përmes ngritjes dhe funksionimit në eficencë të Agjencisë Kombëtare për Bregdetin.
- Lufta kundër krimit të organizuar dhe trafikut të lëndëve narkotike.
- Përmirësime radikale në sistemin e shëndetësisë.
- Punësim në bazë të meritës e konkurrencës.
- Reforma në arsim.
PREMTIM I PAMATSHËM
- Thjeshtëzim real i procedurave tatimore.
Gazeta Shqiptare
