Më 21 Maj 1990, Marlene Warren u vra në derën e shtëpisë së saj. E vetmja gjë që u mësua nga policia atë kohë, ishte se vrasësi ishte veshur si një kloun.
Pikërisht në atë ditë, Marlene Warren ishte duke ngrënë mëngjes me djalin, Joey dhe disa miq të saj. Një makinë parkoi para shtëpisë nga ku doli një kloun.
Ai eci drejt derës dhe mbante në dorë një tufë me lule dhe dy tullumbace. Marlene hapi derën dhe i panjohuri në derë i ofroi lulet.
Djali i saj, Joey mban mend që ajo të ketë thënë vetëm “Sa të bukura!” dhe pastaj papritur u qëllua në kokë me një plumb pistolete.
Vrasësi, përcjell tvklan.al, i cili kishte vënë paruke portokalli, kishte lyer fytyrën në ngjyrë të bardhë dhe kishte vendosur një hundë të kuqe dhe doreza, u kthye në makinë qetësisht dhe u largua nga vendi i ngjarjes.
Marlene vdiq dy ditë më vonë, ndërsa vrasja që ndodhi në Wellington, Florida qëndroi e pazbuluar për gati tre dekada.
Dyshimet fillimisht për vrasjen e saj ranë mbi burrin e Marlene, Michael Warren, për shkak se martesa e tyre kishte kohë që ishte në vështirësi dhe Marlene kishte deklaruar se do ta linte atë.
Çifti kishte më shumë se 1 milion dollarë në prona dhe biznese që ishin në emrin e Marlene.
Policia vendosi që Michael nuk ishte vrasësi, por menduan se do të ishte një person me të cilin ai ishte njëfarë lidhjeje.
Dhe në këtë mënyrë vëmendja u kthye drejt Sheila Keen, me të cilën flitej se Michael kishte një lidhje jashtë martesore, madje fqinj të saj kishin menduar se ajo ishte martuar me Michael për shkak se shihen shpesh në shtëpinë e saj.
Por policia arriti ta zbulonte se Sheila Keen ishte vrasësja pasi në rrugën ku ajo jetonte ishte vetëm një dyqan kostumesh në të cilën besohej se u shit lloji i tullumbaces që mbante vrasësi.
Policia mendoi se mund të ishte një femër ajo që kishte blerë kostumin e klounit, dy ose tre ditë para vrasjes, por nga provat e ADN-së asokohe, prokurorët nuk arritën të akuzonin dot as Michael Warren dhe as Sheila Keen.
Hetimet për çështjen u rihapën në vitin 2014 dhe policia zbuloi se në vitin 1990, Michael Warren ishte dënuar për vjedhje dhe shantazh në lidhje me biznesin e tij të makinave dhe pasi ishte larguar nga burgu, ai dhe Sheila Keen ishin zhdukur së bashku.
Më pas, policia ndoqi gjurmët e Sheila Keen dhe zbuloi se ajo ishte divorcuar nga burri i parë dhe ishte martuar me Michael në vitin 2012, në Las Vegas. Ata kishin nisur të drejtonin një restorant në Tennessee.
“Si rezultat i hetimit, u bë lidhja e ngjarjes dhe Sheila Keen ka vrarë Marlene Warren”, tha policia.
Por thellimi në analizat e ADN-së besohen se luajtën një rol të rëndësishëm që juria të ngarkonte Sheila Keen me akuzën “vrasje të shkallës së parë.”
Sheila Keen, tashmë 54 vjeçe, u arrestua të martën, 27 vjet pas ngjarjes në Washington County, 800 milje larg vendit ku vrau Marlene Warren./a.m.
