Mirëupafshim Google!
Google njoftoi një ndarje të madhe të strukturës së saj operative, duke krijuar një kompani tjetër të quajtur “Alphabet”, e cila do të përmbajë filiale për të ndarë biznesin e saj bazë të reklamave në internet nga sipërmarrjet më të reja, siç janë makinat pa shofer.
Kjo lëvizje cilësohet si një përpjekje për ti lejuar kompanisë të përqendrohet në projektet e saj më kreative dhe ambicioze. Lajmi surprizë i rriti aksionet e Google me 7%, në rreth 708 dollarë për aksion. Kompania Alphabet Inc do të zëvëndësojë Google si një entitet i tregtimit publik dhe të gjitha aksionet e Google, automatikisht do të konvertohen në të njëjtin numër të aksioneve të Alphabet, me të gjitha të drejtat.
“Kjo strukturë e re do të na ndihmojë të fokusohemi mbi mundësitë e jashtëzakonshme që kemi brenda Google”, deklaroi bashkëthemeluesi dhe njëkohësisht shef ekzekutiv, Larry Page, në një postim në blogun e tij. Larry Page do të shërbejë si shef ekzekutiv i kompanisë së krijuar rishtazi, ndërsa Ruth Porat, i cili ju bashkua Google pasi u largua nga Morgan Stanley, do të emërohet shef financiar i të dyja kompanive.
Ndërsa Sundar Pichai, i cili në kohët e fundit ka shërbyer si zëvëndëspresident i divizionit të produkteve, do të jetë kreu i Google, divizioni i motorit të kërkimit të Alphabet. Struktura e re u njoftua menjëherë pas mbylljes së Wall Street në sesionin e së Hënës.
Larry Page saktësoi se “Alphabet është kryesisht një koleksion kompanish, ku më e madhja prej të cilave, është natyrisht, Google. Kompania njoftoi gjithashtu se marrëveshja e re do të hyjë në fuqi më vonë
gjatë këtij viti.
