Vizita në Tempullin e Qiellit, ku Xi Jinping ftoi Donald Trump në hapje të samitit të tyre të enjten, mund të frymëzojë mendime të qeta dhe pothuajse mistike për dy liderët. Por në prapaskenë, këto ngjarje vënë nën presion ekstrem zyrtarët e protokollit dhe ekipet e sigurisë. Ndonjëherë situatat dalin jashtë kontrollit, deri në përplasje të vogla mes truprojave të veshur me kostume të zeza dhe kufje komunikimi.
“Janë angazhime traumatike për ata që duhet t’i organizojnë”, tha për Wall Street Journal Rick Waters, i cili mori pjesë në përgatitjet e vizitës së Trump në vitin 2017.
Misioni i presidentit amerikan, që nis të mërkurën në mbrëmje dhe përfundon të premten pasdite, kërkon angazhimin e qindra personave nga të dyja palët për të siguruar që çdo lëvizje dhe çdo kontakt me publikun apo zyrtarët të jetë i planifikuar në detaje. Edhe një foto e gabuar mund të krijojë perceptim dobësie.
Siguria në Pekin është jashtëzakonisht e rreptë edhe në ditë normale, ndërsa armë mbajnë vetëm forcat e rendit. Megjithatë, incidenti me të shtëna në prill në një darkë për shtyp në Uashington ka shtuar shqetësime të reja për ekipin e Shërbimeve Sekrete, i cili tashmë ndodhet në Pekin për përgatitje paraprake.
Në Pekin kanë mbërritur tashmë edhe disa limuzina të blinduara “The Beast” të White House, të transportuara me avion cargo. Automjetet janë zakonisht dy ose tre identike, për të shmangur rreziqe teknike dhe për arsye sigurie.
Protokolli kinez kërkon njoftime diplomatike të detajuara për çdo armë apo pajisje komunikimi që sjellin truprojat amerikane. Çdo gjë planifikohet me saktësi ekstreme në intervale 15-minutëshe, të quajtura “tick-tock”.
Në raste të mëparshme, organizimi i vizitave të tilla ka sjellë situata të pazakonta. Gjatë vizitës së George W. Bush në Pekin në vitin 2005, një kërkesë për një xhiro me biçikletë u realizua duke ndërtuar me shpejtësi një pistë të veçantë nga ushtria kineze.
Ndërsa në vitin 2016, gjatë samitit G-20 në Hangzhou, vizita e Barack Obama u shoqërua me një incident protokollar, kur mungoi shkalla zyrtare e zbritjes nga avioni, duke detyruar presidentin amerikan të përdorte shkallën e zakonshme të avionit.
Vizita e Donald Trump në Pekin në vitin 2017 u shoqërua gjithashtu me tensione mes ekipeve të sigurisë, madje edhe përplasje të vogla në korridore mes truprojave.
Në një rast tjetër, gjatë vizitës së Xi Jinping në San Francisko në vitin 2023, truprojat kineze pastruan me kujdes enët e përdorura për të eliminuar çdo gjurmë biologjike, një praktikë e rreptë sigurie që tregon nivelin e lartë të kontrollit protokollar.
Në prapaskenë, samitet mes dy superfuqive janë një balancë e kujdesshme mes diplomacisë, simbolikës dhe sigurisë ekstreme, ku edhe detajet më të vogla mund të kenë peshë politike.
