Një tjetër aksion i suksesshëm i Policisë së Shtetit ka bërë të mundur zbulimin dhe sekuestrimin e rreth 1 ton kanabis sativa në Mirditë si dhe arrestimin e një prej poseduesve. Në kuadër të finalizimit me sukses të operacionit të koduar “Oroshi”, policia ka sekuestruar sasinë e madhe të lëndës narkotike si dhe ka asgjësuar në të njëjtën kohë edhe 1 parcelë me 155 bimë narkotike të kultivuara.
Në prangat e policisë ka rënë Viktor Kola, banues në fshatin Bulsharë të Mirditës ndërsa janë shpallur në kërkim edhe 3 posedues të tjerë të drogës.
Në kërkim janë shpallur shtetasit: Akelian Gjoka, banues në fshatin Bulshare, Albert Gjoka, banues në fshatin Bulsharë, si dhe Marte Gjoka, banuese në fshatin Bulshare.
Arrestimi dhe shpallja në kërkim e këtyre shtetasve u bë pasi gjatë një kontrolli të ushtruar në fshatin Bulshare, janë gjetur 2 parcela të mbjella me bimë narkotike kanabis sativa.
Njëra parcelë ishte e korrur dhe materiali bimor ishte ne proces tharje me një peshë prej 931 kg e cila u asgjësua me anë të djegjes.
Gjithashtu u sekuestruan në cilesinë e provës materiale 8 thasë me lëndë narkotike të llojit kanabis sativa me një peshë prej 57 kg e cila ishte bërë gati për tu hedhur ne treg.
Në parcelën tjetër u gjetën 155 rrënjë kanabis sativa të cilat u asgjësuan me anë të djegjes.
Materialet në ngarkim të shtetasve të lartepërmendur i kaluan Prokurorise së Rrethit Gjyqesor Lezhë për veprën penale të “Kultivimit të lëndëve narkotike” dhe “Prodhim dhe shitje te narkotikeve”.
