Kryeministri Edi Rama është ndalur pasditen e sotme në Rrëshen për të zhvilluar një takim elektoral me banorët e zonës. Rama u ndal tek investimet e bëra në Mirditë, dhe ndryshimin në sheshin kryesor të qytetit. Teksa vlerësoi punën e bërë nga kreu i Bashkisë së Mirditës, Rama tha se projekte të tjera do të transformojnë zonën. Sipas kreut të Qeverisë në këtë zonë është ndërhyrë edhe për procesin e vaditjes.
Kryesocialisti ka ftuar mirditorët të votojnë Partinë Socialiste në 25 qershor. Ai tha se Lindita Nikolla, e cila kryeson listën e PS për Rrëshenin, ka realizuar një nga reformat më të rëndësishme sipas Ramës, atë në arsim. Kryeministri tha se nuk do të lejojë kthim pas për këtë reformë, por theksoi se do ta vijojë më tej. Teksa ka ftuar qytetarët të votojnë më 25 qershor, Rama bëri apel që vota të mos ketë ngjyrë, pra sipas preferencave politike, por të jetë për të ardhmen e vendit.
Rama tha se demokratët i kanë një borxh PS-së. “Tani demokratët na kanë një borxh neve. Se ne ua shpëtuam Lulin. E nxorëm nga çadra dhe e futëm në zgjedhje”, tha Rama. “Kur them unë që Luli është në gjumë, ai thotë mos trego barsoleta. Ja shikojeni vetë. 700 afate ka shkelur, sepse flë gjumë. Zgjohet para kamerave në Republikën e Re dhe pastaj shko e fle e gjumë”, tha Rama më tej.
Rama ndërkaq ka prezantuar kandidatët për deputetë për Rrëshenin.
ma.me
