Miratohet në praim nisma e 28 deputetëve të opozitës parlamentare për ndryshimet kushtetuese në ndryshimin e sistemit dhe eleminim të koalicioneve parazgjedhore.
Pas 2 orësh diskutime tek mbledhja e përbashkët e Komisionit të Ligjeve dhe Këshillit të Legjislacionit, 16 deputetë votuan pro projektligjit, asnjë abstenim, kurse kundër ishte vetëm deputeti Adriatik Alimadhi.
Tashmë do të ketë edhe një tjetër votim për këtë projektligj në Komision pasi ky ishte miratim vetëm në pranim teksa vlen të theksohet se pro votuan edhe deputetë nga mazhoranca si Bashkim Fino, Alket Hyseni apo Klotilda Bushka.
Ndërkohë në Këshillin për Legjislacionin dhe Komisionit për Çështjet Ligjore, ka pasur debate të forta mes deputetëve të opozitës.
Deputeti Myslym Murrizi ka debatuar me Adriatik Alimadhin në lidhje me firmat për ndryshimin e Kushtetutës. Murrizi ka hedhur akuza ndaj Alimadhit duke thënë se nuk dinë se çfarë firmosin.
Nga ana tjetër Alimadhi është shprehur se në vend të deputetit Kostaq Papa ka firmosur dikush emrin e tij tek një listë e cila ai nuk donte të ishte.
DEBATI NE KOMISIONIN E LIGJEVE
Alimadhi: Verifikoni listën. Kanë firmosur në vend të një deputeti nga Saranda që nuk ka firmosur vetë. Aty keni Kostaq Papën.
Murrizi: Disa diversione kur s’je nismëtar, është njësoj si të flasë Murrizi për Kushtetutën e Bosnjes. Nuk është Kostaq Papa ashtu sikur nuk je ti. Apo s’po të vijmë pas avazit.
Alimadhi: Nuk dinë ç’farë kanë firmosur, dhe janë të papërgjegjshëm. Janë të papërgjegjshëm për propozimin që kanë bërë, jo se janë.
/a.r
