Analisti Skënder Minxhozi, i ftuar në studion e emisionit “Real Story”, shprehu shqetësimin e tij për mënyrën se si po trajtohen zgjedhjet në Shqipëri, duke e cilësuar procesin zgjedhor si gjithmonë të mbushur me “minutën e fundit”. Minxhozi theksoi se një proces kaq i rëndësishëm duhet të ishte planifikuar dhe organizuar më herët, dhe jo të merreshin vendime të rëndësishme në prag të zgjedhjeve. Ai u shpreh se stafi i Komisionit Qendror të Zgjedhjeve (KQZ) dhe i autoriteteve përkatëse janë të detyruar të punojnë nën një presion të madh për shkak të mungesës së përgatitjeve të duhur.
Analisti gjithashtu kritikon dy standarte të përdorura nga partitë politike, të cilat, sipas tij, janë të lejuara për votuesit jashtë Shqipërisë, ndërkohë që janë shumë rigorozë ndaj shqiptarëve që jetojnë brenda vendit. Ai e quajti të papranueshme situatën kur një fletë votimi që mund të ndotet aksidentalisht, shpallet e pavlefshme, duke krijuar një hendek mes qytetarëve që votojnë në vend dhe atyre që votojnë jashtë Shqipërisë.
Minxhozi sugjeroi se ky proces do të kishte qenë më i saktë dhe më i organizuar nëse kishte nisur më herët, duke e konsideruar të pashpjegueshme që disa çështje të rëndësishme, si regjistrimi i votuesve, janë akoma të pazgjidhura vetëm disa javë përpara zgjedhjeve. Ai u shpreh se mungesa e një plani të qartë dhe të parashikueshëm po krijon një situatë stresuese, me rreth 160,000 qytetarë të paregjistruar që ende nuk kanë mundësi të votojnë.
