Dy adoleshentet kushërira, të cilat u larguan përpara disa ditës nga shtëpia duke u lënë një letër familjarëve, që shkruante “Do të ikim në Angli”, rezulton të kenë qenë pre e një mashtrimi nga një djalë “biznesmen”, të cilën minorenet e kishin njohur në rrjetin social.
Njëra nga vajzat ishte njohur me djalin në fjalë, i cili i kishte thënë se ai ka biznese dhe se mund ta çonte adoleshenten me inicialet A.R në Angli. Madje, nëse do të vinte edhe kushërira e saj, me inicialet SH.H, 15 vjeçe, atëherë ai do ta njihte me kushëririn e tij.
Djali i kishte mashtruar vajzat duke i thënë se jetonte i vetëm në Lushnje dhe se kishte një biznes në këtë qytet, ndërkohë që familjarët e tij ndodheshin në Itali.
Vajzat pas arratisjes shkuan në Lushnje dhe u takuan me djalin, i cili pasi i kishte njohur edhe me disa shokët e tij, më pas u kishte kërkuar të kryenin marëdhënie seksuale. Madje, pasi dy të miturat nuk kanë pranuar, djemtë në fjalë i kanë detyruar të shkonin në një hotel pranë zonës.
Ndërkohë mediat kishin publikuar lajmin për largimin e dy adoleshenteve nga Durrësi. Pasi shkuan te hoteli, përballen me rojën që nuk i lejon të futen brenda. Për fat të mirë, roja i hotelit ishte informuar në media për largimin e kushërirave dhe nuk i ka lejuar të merrnin dhomë.
Ai i kishte paralajmëruar se do të lajmëronte policinë dhe në këto momente adoleshentet dhe shoqëruesit e tyre janë trembur. Ato janë detyruar të lajmërojnë me anë të rrjeteve sociale kushëririn e tyre, i cili bashkëpunoi menjëherë me policinë dhe bënë të mundur gjetjen.
