Ministrja e Arsimit, Besa Shahini ka deklaruar se pakoja financiare për bursat e studentëve kap shifrën e 2.3 mld lekë të reja. Gjatë raportimit të saj në Komisionin e Edukimit, Shahini tha se janë ndarë bursat për dy kategori, ekselentët dhe shtresat në nevojë.
“Kemi ndarë bursa prej 10 mijë lekë për dy kategoritë studentët ekselentë dhe studentët në nevojë. Për studentët e ciklit të dytë ka përgjysmim tarife për ata që janë më të mirët dhe ata që j anë në nevojë. Kjo si pako financiare kap vlerën e 2.3 mld lekë të reja. Ka filluar disbursimi që në janar”, deklaroi Shahini.
Po ashtu, Shahini i bëri thirrje studentëve që përfitojnë bursa të hapin llogaritë bankare.
“Muaji i parë ishte pak i ngadalshëm për shkak se ka shumë punë nëpër sekretaritë për të mbledhur informacionin për të gjithë studentët. Tani është stabilizuar situata dhe jemi shumë më mirë në disbursimin e bursave. Është një grup i studentëve që nuk kanë marrë bursën që ju takon dhe një pjesë e tyre nuk i kanë hapur llogaritë bankare. Sa më shpejt studentët të shohin pranë sekretarive që janë përfitues të bursave të hapin llogaritë bankare që të përfitojnë bursën që u takon”, tha ministrja.
g.kosovari
