Ndonëse Shqipëria po shënon ditë pas dite rritje të numrit të të infektuarve me virusin Covid-19, ministrja e Shëndetësisë Ogerta Manastirliu thotë se situata është nën kontroll. E ftuar në emisionin Përballë të gazetarit Lutfi Dervishi në RTSH, Manastirliu tha se rritja e numrit të të infektuarve ishtë e pritshme pas rihapjes.
“Situata nuk ka dalë nga kontrolli. Ekspertë të ndryshëm vlerësojnë se në momentet kur rihapemi, apo kur fillojmë gradualisht në mënyrë të kujdesshme të rihapemi dhe më pas vjen dhe një hapje finale, pritshmëritë e njerëzve fillojnë të rriten.
Pra mendojnë që tashmë izolimi ka sjellë efekte të mira pasi janë ulur numrat pozitiv, rastet ditore janë ulur, atëherë pse jo të mos shpresojmë në të përbrendshmen tone, që do të vijojë të jetë kështu.
Absolutisht nuk vjen kjo për arsye të humbjes se vigjilencës të autoritetit të shtetit versus rregullave që ai vendos.
Por është një pritshmëri e të gjithë njerëzve për të lehtësuar, për të ulur pak atë vigjilencën që e kishin më parë kur ishin ne izolim, në karantinë.
Një moment që duhet kapur në kohë për të tërhequr frerët e lëshimit dhe për të mundësuar pikërisht vendosjen dhe vigjilencën në rikthimin prapë tek rregullat që ky virus kërkon” – theksoi Manastirliu në Përballë.
Ministrja e Shëndetësisë foli edhe për rastet e infektimit në sistemin shëndetësor. Ajo theksoi se nuk është një situatë për t’u nënvlerësuar, por nuk pranoi të cilësonte QSUT vatër infeksioni.
“ QSUT nuk ka qënë një vatër po themi infeksioni, apo nuk mund të konsiderohet një vatër, mund të konsiderohet një shërbim, pra aty ku ka patur një zanafill të infektimit, i cili është ndërprerë në sajë të hetimit epidemiologjik.
Dhe lajmi i mirë është që shërbimi i mjekësisë interne i cili u mbyll pas gjithë masave që u morën, përsëri është kthyer në shërbim dhe vijon të ofrojë shërbime për qytetarët.
Fenomene të tilla nuk janë vetëm në Shqipëri, në San Rafaele në Romë në një spital shumë të njohur pati një infeksion, në Spanjë gjithashtu, në SHBA.
Këto fenomene njihen në struktura siç janë spitalet ku ekspozimi ndaj virusit është më i madh.
Por nga ana tjetër mbrojtja e personelit dhe zbatimi i protokollit nga personeli duhet të jetë po aq me të gjitha paramentrat që duhet, që të mos lejojmë një shpërndarje të infeksionit.
Sigurisht mund të ketë pasur një problematikë të caktuar dhe këtë duhet ta pranojmë, sepse duhet të përmirësohemi dhe aty ku ka patur një problematikë të vogël, dhe QSUT është duke marrë masa për të vlerësuar me hetimin epidemiologjik se kush është shkaku i zanafillës së infeksionit” – tha Manastirliu në Përballë.
Manastirliu thotë se me hapjen e të gjitha shërbimeve shëndetësore, ekspozimi ndaj virusit është më i lartë.
“Ekspozimi është shumë herë më i madh sepse aty vijnë të sëmurët kronikë, aty vijnë të sëmurët urgjent, aty ballafaqohen shumë më shpesh me ata të cilët e kanë marrë virusin dhe sigurisht nuk mund të flasim për vatra infeksioni.
Duhet të flasim për hetime të cilat janë kryer në kohë për të parandaluar që ky zinxhir infeksioni të na shkaktonte mbylljen e spitaleve.
Atëherë po do të ishim në një situatë ku do të kishim një alert shumë më të madh. Po sigurisht kjo nuk është një situatë për tu nënvlerësuar, përkundrazi” – tha Manastirliu në Përballë.
