Ministrja u ndal tek kompania Beba Cosmetics, e cila nga 56 produkte që prodhon, 53 prej tyre i ka të regjistruara dhe të mbrojtura me markë pranë Drejtorisë së Përgjithshme të Patentave dhe Markave, institucion në varësi të MZHETTS.
Ministrja Ekonomi teksa përgëzoi përfaqësuesit e kësaj kompanie për seriozitetin dhe për regjistrimin e pronësisë së tyre industriale, theksoi se bizneset duhet të ndërgjegjësohen për të ndjekur të njëjtin model, që të mbrojnë pronën e vet industriale, pasi kështu janë dhe më konkurrues në treg.
Ministrja u shpreh se produktet ‘Made in Albania’ janë një faktor shumë i rëndësishëm për ekonominë e Shqipërisë.
“Pronësia industriale është një mjet komunikimi në treg mbi cilësinë dhe origjinën e produkteve që na ofrohen. Ajo përbën garanci për konsumatorin, por edhe reputacion për ju si sipërmarrës. Është fakt i njohur që sistemi i pronësisë industriale është motor nxitës i zhvillimeve të tregut”, tha Ministrja Ekonomi.
Ajo shtoi se për shumë kompani vlera e aseteve jo materiale, siç janë patentat mbi shpikjet, markat tregtare apo disenjot industriale e tejkalon dukshëm vlerën e aseteve fizike, ndaj është i domosdoshëm regjistrimi dhe mbrojtja e tyre.
Përfaqësuesit e kompanisë u shprehën shumë të kënaqur nga bashkëpunimi me Drejtorinë e Përgjithshme të Patentave dhe Markave, për regjistrimin e produkteve.
Kjo kompani eksporton në disa vende të rajonit, ku nevojitet që gjithashtu këto marka të regjistrohen dhe ne vendet respektive.
Ministrja Ekonomi u shpreh se është për të ardhur keq që ka një numër të vogël markash të regjistruara jashtë territorit të Shqipërisë, ndaj kërkohet një punë më e madhe për të ndërgjegjësuar kompanitë shqiptare të regjistrojnë markat e tyre në vendet ku eksportojnë duke synuar mbrojtjen e produkteve.
Ajo shtoi se Qeveria shqiptare, i ka përshtatur më së miri kriteret, duke aderuar në marrëveshjet ndërkombetare të kësaj fushe, për t’i dhënë mundësinë sipërmarrëseve shqiptare, të kërkojnë të drejtat e mbrojtjes edhe në vendet partnere, ku kanë të shtrirë aktivitetin e tyre.
Kompania në fjalë është një kompani shqiptare, e cila që prej vitit 1993 ka arritur të prodhojë një gamë të gjerë produktesh ku përfshihen: grupi i kremrave per bebe, locioneve, pudrave, artikujt për mbrojtjen e flokëve, detergjent të ndryshëm pastrimi si edhe artikuj të sezonit veror për mbrojtje të lëkurës. Sot veprimtaria e saj është e shtrirë në një territor të gjerë brenda dhe jashtë Shqipërisë.
