Ministrja e Financave dhe Ekonomisë, znj. Anila Denaj, në prani dhe të Zëvëndëskryeministrit Erjon Braçe, prezantoi dy drejtuesit e rinj të administratave Tatimore dhe Doganore, përkatësisht Enton Duro dhe Arlind Gjokuta.
Gjatë ceremonisë së prezantimit, Ministrja Denaj vlerësoi punën e bërë gjatë vitit të kaluar nga dy administratat, e konkretizuar edhe me rezultate pozitive në mbledhjen e të ardhurave. Gjithashtu, Ministrja u shpreh se prioritet për të dy administratat fiskale edhe për këtë vit do të jenë komunikimi me biznesin, rritja e transparencës dhe lufta kundër informalitetit.
Zëvëndëskryeministri Erjon Braçe u shpreh se e gjithë vëmendja e këtyre administratave duhet të përqëndrohet tek komponenti, që ai e quajti ligjor, të drejtë dhe të barabartë në vlerësimin e çdo transaksioni që kryhet. Përmes këtyre elementeve, tha Braçe, i gjithë zhvillimi ekonomik i vendit merr natyre tjetër. “Nëse ne jemi ligjorë, nëse ne jemi te drejtë, nëse ne jemi të barabartë me secilin prej operatorëve që operojnë në treg, padiskutim që i kemi dhënë mundësi ekonomisë të jetë edhe konkurruese, por edhe e lirë në raport me atë që zhvillohet në secilin treg ku operatorët operojnë. Kështu që, veprimi i çdo nëpunësi tonë në raport me këto elementë do jetë ajo që përcakton më tutje edhe vlerësimin e punës së gjithsecilit”, tha Braçe.
Ndërsa, dy drejtuesit e rinj, Duro dhe Gjokuta, prezantuan objektivat e tyre në lidhje me drejtimin e institucioneve që do të drejtojnë, si dhe shprehën vullnetin e mirë për rritjen e bashkëpunimit edhe me sipërmarrjen.
/a.meta
