Ministrja e Financave, Anila Denaj thotë se kriza politike sjell lëkundje të forta në ekonomi.
“Krizat politike krijojnë lëkundje shumë të forta në Ekonomi. Ne nuk do ta quaj një situatë të tillë, por sigurisht kjo krijon paqëndrueshmëri. Krijon pasiguri edhe tek ata që vijnë të investojnë në Shqipëri. Mund të ndikojnë tek turistët dhe tek bizneset që duan një vend të qetë. Për çdo qytetar nëse ka një qetësi politike ka qetësi më të madhe ekonomike dhe qytetarët krijojnë qëndrueshmëri më të madhe”, u shpreh ajo në emisionin “Java” në TVSH.
Ministrja Denaj tha se edhe gjatë vitit 2020, borxhi publik do të ulet. Ministrja u shpreh se buxheti për koncesionet nuk shkon as në 4% të Prodhimit të Brendshëm Bruto. “Ne menaxhojmë se sa shuma e koncesioneve kalon buxhetin bazë. Ministria e Financave menaxhon paratë deri në 5% dhe nëse kalohet ky tavan ke thyer ligjin. Aktualisht jemi në 3%. Buxheti nuk mund të të japë OK për një kontratë nëse kalon ky 5%. Ligji buxhetor është një ligj që aplikohet dhe çdo marrëdhënie kontraktuale zbatohen dhe nuk mund të lihen në mes të rrugës. Koncesionet janë kontrata. Me këto projekte nuk do të thotë se nuk do të kemi një PPP të ri”, u shpreh ajo.
Ministrja u përgjigj edhe termit “Zonja e ftohtë”, duke theksuar: “Termi zonja e akullt u përdor në daljen time të parë në Parlament. Afër foltores erdhën deputetët e opozitës por unë nuk pata asnjë shqetësim. U tregova e ftohtë. Kur je duke bërë një detyrë të përgjegjshme detyrimisht je e ftohtë. Unë vij nga një situatë e një viti jo të lehtë, e cila pati ndikim edhe në ekonomi. Pati një tkurrje. Duhet të sillesh me përgjegjshmëri. Detyra që unë kam është me shumë përgjegjësi”.
/a.r
