Ministrja e Bujqësisë Frida Krifca paralajmëroi krijimin e regjistrave online për fermerët, blegtorët dhe Autoritetin Kombëtar të Ushqimit.
Ajo u shpreh se po ndërtohet për herë të parë regjistri i fermës për certifikuar inventarin e plotë për secolën fermë ku do të ketë informacion për prodhimin dhe pesticidet që përdoren.
“Përqafimi i teknologjisë dhe digjitalizimit ka hapur në MB një kantieri të rëndësishëm që synon grumbullimin e informacionit dhe përditësimin në nivel ferme. Ne po ndërtojmë për herë të parë regjistrin e fermës për të certifikuar inventarin e plotë për secilën fermë dhe na jep informacion për protokollet dhe pesticidet që përdoren. Ne me anë të këtij regjistri mund të ofrojmë siguri të plotë për prodhimin.
Adresojmë një kërkesë të raport progresit të BE. Vijojmë me një sistem të ri digjital të blegtorisë. Ky sistem do mundësojë shkëmbim informacion mes blegtorëve. Do vëmë në jetë edhe një sistem digjital për AKU që do të gjurmojë procedurat e inspektimit. Këtu mundësojmë shmangien e abuzimit nga ana e inspektorëve. Program online për të marrë informacion për cilësinë e tokës ku fermeri kërkon të punojë. Kemi kryer 63% të sipërfaqes së tokës në nivel kombëtar”, tha ajo.
Ajo njoftoi nisjen e një auditi për pronat në pronësi të Ministrisë së Bujqësisë. “Ministria e Bujqësisë administron një fond prej 8 mijë parcela që gjenden në pjesën më të madhe të vendit në disa qarqe të ndryshme. Kjo tokë i vihet në dispozicion sipërmarrëvesve privatë. Ministria publikon këtë listë në faqen e uebit të saj. Është transparente dhe publike sot.
Shfrytëzimi i kësaj toke rregullohet me anë të një kuadri ligjor. Po kryejmë me të njëjtën qasje një program inventarizimi të dimë se çfarë kemi. Kemi kërkuar informacion në 28 drejtori vendore dhe në 61 bashki për gjendjen e tokës në pronësi të Ministrisë së Bujqësisë. Na kanë rezultuar mospërputhje të mëdha.
Ka parcela që rezultojnë të lira por nuk janë të lira. Informacioni nuk përputhet me realitetin. Janë ngritur 24 grupe që të verifikojnë edhe njëherë listat dhe të verifikojnë edhe njëherë në terren informacionin e grumbulluar. Ka përfunduar procesi i verifikimit dhe po vazhdon në disa qarqe. Brenda vjeshtës do bëjmë publike një platformë të re me parcelat në pronësi të Ministrisë së Bujqësisë që do të integrohet në një hartë digjitale”, u shpreh ajo.
/a.r
