Ministria e Financave i bëri thirrje ish të dënuarve politikë që janë gjallë dhe që nuk kanë marrë këstet e fundit të dëmshpërblimeve të paraqesin dokumentat bankare për tu futur menjëherë në listat e përfituesve. Lajmi raportohet nga Top Channel, i cili citon Drejtoren e Pagesave në MF.
“Në rast se një qytetar përfitues që është gjallë nuk ka përfituar këstin e 4 e të 5-të, po vetëm tre të parat, ai paraqitet para zyrave tona. Duke dorëzuar një certifikatë personale të muajit aktual dhe vërtetim të llogarisë bankare, me vulë të njomë dhe një firmë nga banka dhe ai menjëherë hyn në radhë për pagesë, dhe përfiton dhe këstin e katërt dhe këstin e pestë”, tha Alma Delija, Drejtore e Pagesave dhe Dëmshpërblimeve.
Sipas Top Channel, aktualisht janë 23 dosje të plotësuara, nga të cilat 2300 i përkasin të përndjekurve që janë gjallë, ndërsa të tjerat 20. 700 janë për subjeket e trashëgimtarëve. Sipas ligjit aktual kategoria e atyre që janë gjallë janë përfituesit e parë. 70 % e fondit prej 2 miliard lekësh për këtë vit do të shkojë për ta dhe do të marrin këstin 5 nga 8 që janë gjithsej.
Ndërsa për kategorinë e trashëgimtarëve do të shpërndahet vetëm kësti i dytë. Me këto ritme pretendohet që të persekutuarit politikë që janë gjallë të dëshmpërblehen plotësisht brenda vitit të ardhshëm. Më pas skema do të vazhdojë me trashëgimtarët.
