Ministria e Arsimit publikon udhëzimin e parë për zhvillimin e provimeve të maturës, i cili në fakt nuk ka asnjë ndryshim nga ai i vitit të shkuar. Pesë provime: tre me detyrim e dy me zgjedhje do të jenë sërish në listën e detyrimeve për maturantët, që do të pasqyrohen në formularin A1Z.
Në listën e lëndëve me zgjedhje janë 50 lëndë, prej të cilave 21 për shkollat e mesme, 3 për ato artistike dhe 26 për shkollat profesionale. I vetmi ndryshim prek këta të fundit, të cilët nuk janë të detyruar më t’i nënshtrohen një provimi me zgjedhje të detyruar siç ishte “Teoria profesionale”, por mund të zgjedhin një lëndë të profilit dhe një tjetër nga grupi i lëndëve që japin shkollat e mesme (pasqyruar në tabelën përbri shkrimit). Kushti është i njëjtë: dy lëndë me të paktën tetë kredite. Askush nuk mban përgjegjësi për zgjedhjen që ata kanë bërë.
“Maturanti/kandidati zgjedh dy lëndë nga lista e lëndëve me zgjedhje, pavarësisht nëse i ka zhvilluar ose jo, apo i janë ofruar ose jo nga shkolla në programin mësimor”, sqarohet në pikën 2.8 të udhëzimit nr.26, që mban firmën e dy ministrave, Lindita Nikolla e Blendi Klosi. Udhëzimi u jep përgjigje edhe maturantëve të viteve të kaluara, të cilët dëshirojnë të ndjekin fakultetin e po ashtu edhe mbetësve që duan të diplomohen. RISITË Procedura e re e pranimeve në universitete do të reflektojë të gjitha ato për të cilat matura e vitit të kaluar është ankuar në fund të procesit.
Zyrtarë në Ministrinë e Arsimit bëjnë me dije se brenda janarit, të gjitha universitetet do të kenë dërguar në ministri e pasqyruar në faqen e tyre zyrtare kriteret e pranimeve të reja me qëllim për t’i ndihmuar në kohë maturantët në caktimin e lëndëve me zgjedhje. Ndryshe nga vitet e kaluara, këshillimi i karrierës do të jetë shumë më i gjatë sesa një muaj. Një proces i tillë do të nisë në çdo shkollë të mesme tre muaj para përfundimit të shkollës, me qëllim që maturantët të bëjnë zgjidhjen e duhur.
Pas një viti eksperimental, edhe sistemi online që do t’u dedikohet maturantëve do të jetë më fleksibël. I gjithë ky proces do të ndiqet nga ministria me kontrolle të rrepta, me synimin që maturantët të marrin rezultatet e duhura./panorama/a.k
