Ministri teknik i Drejtësisë Gazmend Bardhi i është drejtuar kryeministrit Edi Rama me një letër në lidhje me Sekretaren e Përgjithshme të kësaj ministrie, zonjën Juliana Hoxha.
Pasi shkarkoi dhe kallëzoi penalisht 8 zyrtarë të lartë të administratës për përfshirje të paligjshme në fushatën zgjedhore, Ministri Bardhi gjithashtu ka kërkuar pezullimin e Juliana Hoxhës, me argumentimin se ajo është kandidate për deputete e PS-së në qarkun e Tiranës.
“Ministri i Drejtësisë i ka kërkuar zyrtarisht Departamentit të Administratës Publike që të zbatojë Kushtetutën, Kodin Zgjedhor dhe ligjin për nëpunësin civil, dhe të pezullojë nga detyra, Sekretaren e Përgjithshme të Ministrisë së Drejtësisë znj. Juliana Hoxha, e cila ushtron funksionin në kundërshtim flagrant me ligjin, që nga data 29 Prill 2017, për shkak se është kandidate për deputete në Qarkun e Tiranës, me subjektin zgjedhor Partia Socialiste e Shqipërisë.
Për këtë arsye, Ministri i Drejtësisë z. Bardhi ka informuar zyrtarisht Kryeministrin dhe është në pritje të ndërhyrjes së tij për zbatimin e plotë të ligjit.
Ministria e Drejtësisë gjen edhe njëherë rastin të inkurajojë çdo qytetar që të denoncojë, të gjitha rastet e përfshirjes në fushatë apo përdorimit të funksionit publik në favor të një subjekti zgjedhor, si dhe garanton qytetarët jo vetëm për ruajtjen e anonimatit, por edhe për ndjekjen me seriozitet maksimal të këtyre rasteve.”- shkruhet në njoftimin e Ministrisë së Drejtësisë./
