Ministri i Brendshëm Saimir Tahiri i është përgjigjur sot akuzave të opozitës lidhur me çështjen e Arben Frroku dhe largimin e tij jashtë vendit dhjetë ditë para se Apeli ta shpallte fajtor për vrasjen e kryekomisar Dritan Lamaj dhe ta dënonte me burgim të përjetshëm.
Duke folur nga foltorja e Kuvendit, Tahiri theksoi se “pas vendimit të gjykatës së shkallës së parë, që shtetasi ishte i pafajshëm, zotëria nuk kishte ndalim ligjor nga askush për të lëvizur brenda e jashtë vendit”.
Ministri I Brendshëm sqaroi se “në pikën kufitare është regjistruar si të gjithë në regjistrin manual se sistemi TIMS nuk funksiononte prej disa orësh, regjistri është aty, shihet nga të gjithë, nëse PD ka ankesë për këtë t’i drejtohet prokurorisë duk e ia kursyer vetes mundimin e deklaratave spekulative”.
Tahiri ka ftuar opozitën të bëjë verifikimin në regjistër, nëse Frroku është regjistruar apo jo.
“Policia ka bërë verifikimin e statusit të shtetasit dhe pasi është verifikuar është lejuar të udhëtojë, po ashtu edhe jashtë vendit ai u ndalua, dhe pasi policia e huaj komunikoi me Interpol Tirana e kjo e fundit komunikoi me prokurorinë, i ktheu përgjigje duke konstatuar se nuk kishte bazë ligjore për ta ndaluar”.
