Ministri i ri i kabinetit të Isa Mustafës, Ivan Todosijeviç, është njëri nga ideatorët e projektit për kolonizimin e veriut me serbë, të njohur si ‘Lugina e Diellit’.
Në një video ai shihet duke e përuruar nisjen e punimeve për projektin kundërthënës, në prani të ministrit serb për Kosovën, Gjuriç, dhe klerikëve ortodoksë serbë. Këtë e bënte në cilësinë e kryetarit ilegal paralel të Zveqanit, raporton KTV.
Sikurse edhe për shumicën e serbëve që jetojnë në Kosovë, edhe për ministrin e ri që do të paguhet nga buxheti i shtetit të Kosovës, “Kosova e Metohia”, siç thotë ai, është pjesë e pandarë e shtetit serb.
“Shteti i Serbisë edhe njëherë e dëshmon fuqishëm se Kosova dhe Metohia është pjesë e pandarë e saj.
Qeveria jonë në Beograd edhe njëherë tregon se çdo ditë punon për mbetjen dhe për kthimin e popullit serb në hapësirën e Kosovës dhe Metohisë. Lugina e Diellit është projekti më i madh që do të realizohet në territorin e Kosovës dhe Metohisë që prej viteve 90. Faleminderit dhe Rroftë Serbia!”, kishte thënë ai.
Përpos fjalimeve, kundërshtimin e tij për institucionet kosovare dhe fushatën për krijimin e Asociacionit të Komunave me Shumicë Serbe, ministri i ri i Kosovës i ka shprehur edhe nëpërmjet protestave.
Bashkë me 150 qytetarë të tjerë, ai kishte dalë në nëntor të vitit 2015 në Rudar, për të kundërshtuar vendimin e Gjykatës për pezullimin e marrëveshjes për formimin e Asociacionit, duke bllokuar rrugët dhe transportin me kamionë.
Propozimi i tij ka ardhur direkt nga Lista Serbe, gjë që kjo e fundit e ka bërë të ditur edhe nëpërmjet një komunikate.
Me propozim po të Listës Serbe, edhe Marjana Jevtiq është emëruar zëvendësministre e Punës dhe Mirëqenies Sociale, përgatiti Koha. (b.an)
