Në fokus të diskutimeve të Ministerialit të vendeve të Europës Jug-lindore në Berlin, ka qenë kriza e refugjatëve dhe ndikimet e saj të mundshme në politikën e zgjerimit të BE-së, por kjo nuk e ka ndaluar Ministrin e Jashtëm gjerman Steinmeier, që të thotë se problemi i Shqipërisë është refoma në drejtësi.
Duke ju drejtuar Ministrit Bushati, kreu i diplomacisë gjermane tha se Shqipëria është në një rrugë të mbarë drejt integrimit, por duhet të bëjë reformën në drejtësi.
“Shqipëria është në rrugë të mbarë dhe duhet të vijojë tashmë me detyrën e vështirë të një reforme tërësore dhe të thellë të sistemit të drejtësisë”, është shprehur Steinmeier.
Ministri Bushati tha se kriza e refugjatëve nuk duhet të ndikojë në politikën e zgjerimit të BE-së.
“Ndërsa Ballkani Perëndimor ka operuar mbi një pakt stabiliteti, procesi i Berlinit mundësoi krijimin e një pakti ndërlidhshmërie dhe tashmë vendet tona janë në kërkim të një pakti demokracie dhe zhvillimi”, është shprehur ministri i Jashtëm Bushati.
