Izraeli do të shkatërrojë të gjitha shtëpitë në fshatrat libanezë pranë kufirit dhe 600 mijë persona që kanë ikur nga jugu nuk do të lejohen të kthehen në shtëpi derisa veriu i Izraelit të jetë i sigurt, tha ministri i mbrojtjes të martën, duke premtuar shkatërrim të ngjashëm me Gazën në zonën kufitare.
Israel Katz përsëriti planet e Izraelit për të krijuar një zonë tampon në jug të Libanit, duke thënë se do të mbajë kontroll mbi një pjesë të territorit deri në lumin Litani pasi të përfundojë lufta me grupin Hezbollah të mbështetur nga Irani.
Më shumë se 1.2 milionë persona janë zhvendosur dhe 1 mijë e 200 të tjerë janë vrarë në Liban që nga 2 marsi, kur Izraeli nisi ofensivën kundër Hezbollahut, pas vendimit të këtij grupi për të hapur zjarr në mbështetje të Teheranit në luftën rajonale.
Lumi Litani derdhet në Mesdhe rreth 30 km në veri të kufirit izraelit, dhe zona midis tij dhe kufirit përbën gati një të dhjetën e territorit të Libanit.
Ushtria izraelite (IDF) këtë muaj urdhëroi banorët të largohen nga disa pjesë të jugut, nga lagjet jugore të Bejrutit të kontrolluara nga Hezbollah dhe nga zonat politike të grupit në lindje të Libanit.
Modeli ‘Rafah’
“Pas përfundimit të operacionit, IDF do të krijojë një zonë sigurie brenda Libanit, një vijë mbrojtjeje kundër raketave antitank, dhe do të mbajë kontrollin e sigurisë mbi gjithë zonën deri në lumin Litani, përfshirë urat e mbetura të Litanit,” tha ministri Katz në një deklaratë, citon Reuters.
Ai shtoi se forcat izraelite do të eliminojnë luftëtarët elitë Radwan të Hezbollahut që kanë depërtuar në jug dhe do të shkatërrojnë të gjitha armët. Banorët e zhvendosur nuk do të lejohen të kthehen në jug të Litanit “derisa siguria e banorëve të veriut të Izraelit të garantohet”.
“Të gjitha shtëpitë në fshatrat pranë kufirit libanez do të shkatërrohen, sipas modelit të përdorur në Rafah dhe Beit Hanoun në Gaza, për të hequr përgjithmonë kërcënimet pranë kufirit ndaj banorëve të veriut,” tha ai.
Hezbollahu ka lëshuar 5 mijë dronë e raketa
Zëdhënësi i ushtrisë izraelite, nënkolonel Nadav Shoshani, tha se Hezbollahu ka lëshuar gati 5 mijë dronë, raketa dhe raketahedhës ndaj Izraelit gjatë konfliktit.
Ushtria izraelite njoftoi gjithashtu një valë të re sulmesh që, sipas saj, kishin në shënjestër infrastrukturën e Hezbollahut në lagjet jugore të Bejrutit.
Kjo është lufta e dytë e madhe mes Izraelit dhe Hezbollahut që nga viti 2024. Izraeli i shkaktoi humbje të rënda Hezbollahut në luftën e fundit, duke vrarë udhëheqësin e tij Hassan Nasrallah dhe mijëra luftëtarë.
Ministria e shëndetësisë në Liban ka raportuar se 1 mijë 247 persona janë vrarë nga sulmet izraelite, përfshirë 124 fëmijë dhe 52 mjekë. Burime i thanë Reuters-it javën e kaluar se mbi 400 luftëtarë të Hezbollahut janë vrarë.
Ushtria izraelite ka raportuar gjithashtu se 10 ushtarë të saj janë vrarë në përleshjet me Hezbollahun, një grup i themeluar nga Garda Revolucionare e Iranit në vitin 1982 për të eksportuar Revolucionin Islamik dhe për të luftuar forcat izraelite që kishin pushtuar atë vit.
