Ministri i Shtetit për Mbrojtjen e Sipërmarrjes, Eduard Shalsi, tha në emisionin “Opinion” në Tv Klan se Presidenti Ilir Meta nuk është më neutral dhe ka ndërmarrë një lëvizje kundër qeverisë.
Duke iu referuar deklaratave të ashpra që bëri sot kreu i shtetit, Shalsi u shpreh se kriza politike është e stisur.
“Vërtetë është edhe për të qeshur edhe për të qarë dhe ç’përgjigje mund t’i japësh kësaj konference të çartur. Kjo është një krizë e stisur politike. Në Shqipëri ka një krizë të stisur. Krizë të ca personazheve… Po të kemi parasysh që në Mars dha një deklaratë tjetër po kaq të çuditshme. Sot presidenti doli haptas, nuk është më neutral, është palë, por po kryen një lëvizje kundër qeveritare”, tha ministri Shalsi.
Lidhur me propozimin e Ilir Metës që në 13 Tetor të mbahen zgjedhje të parakohshme presidenciale dhe vendore, Shalsi u shpreh se zgjedhjet bashkiake kanë përfunduar.
“Zgjedhjet vendore kanë mbaruar. Ajo që duhet të ndodhi është që ftesës tonë për të filluar dialogu për reformën zgjedhore duhet t’i përgjigjeshin. Palët të ulen duke mos vendosur më kushte, duke mos lejuar pazare, por deklarata e sotme e presidentit…kjo është një situatë anormale, por kurrsesi jo për fajin tonë. Përballë PD dhe LSI ne kemi qenë korrekt”.
