Ministri izraelit i Mbrojtjes, Israel Katz, ka kërcënuar se do të vrasë liderin e Houthi-ve, pas sulmeve të djeshme me raketa dhe dronë.
“Abdul-Malik al-Houthi, momenti yt do të vijë. Do të dërgohesh të takosh qeverinë tënde në seancë plenare dhe të gjithë anëtarët e eliminuar të boshtit të së keqes që të presin në thellësitë e ferrit”, shkroi Katz në rrjetin social X.
“Flamuri i Houthi-ve me mbishkrimin ‘Vdekje për Izraelin, mallkim mbi hebrenjtë’ do të zëvendësohet nga flamuri blu e bardhë izraelit që do të valëvitet mbi kryeqytetin e Jemenit të bashkuar”, shtoi ai.
Sjellim ndërmend se më 28 gusht, një sulm izraelit në Jemen vrau kryeministrin e qeverisë Houthi dhe të paktën 11 ministra të tjerë.
Një ditë më parë, një dron i rebelëve Houthi goditi një hotel në qytetin më jugor të Izraelit, Eilat. Dy dronë të tjerë dhe një raketë balistike u kapën nga mbrojtja ajrore.
Që nga 18 marsi, kur Forcat e Mbrojtjes së Izraelit (IDF) rifilluan ofensivën kundër Hamasit në Rripin e Gazës, grupi Houthi në Jemen kanë lëshuar 87 raketa balistike dhe të paktën 40 dronë ndaj Izraelit.
