Kryeministri Edi Rama ndodhet në Berlin ku është takuar me ministrin e Jashtëm të Gjermanisë, Sigmar Gabriel. Kryediplomati gjerman theksoi se Shqipëria ka mundësinë e madhe historike t’i bashkohet BE-së.
“Në prag të proceseve zgjedhore, reformat nuk janë të thjeshta. Shumica e shqiptarëve dëshirojnë stabilizimin dhe avancimin e mëtejshëm drejt BE. Shqipëria ka mundësinë e madhe historike që t’i bashkohet BE. Europa ka mundësinë të bashkëpunojë me Shqipërinë dhe fqinjët e saj për paqen e stabilitetin. Për këtë, ju jeni një garant”, është shprehur Gabriel.
Ndërsa kryeministri Edi Rama ka shprehur mirënjohjen e tij për mbështetjen e Gjermanisë, sidomos për reformën në drejtësi.
“Falë mbështetjes jemi në një proces shumë të avancuar. Shpresojmë të jemi në lartësinë e sfidës për të filluar zbatimin e reformës me vettingun e gjyqtarëve e prokurorëve. Shqipëria, partner shumë i angazhuar për këtë marrëdhënie kaq të veçantë të Gjermanisë me rajonin”, ka thënë z. Rama.
Kreu i qeverisë, Edi Rama ka qenë dje një ndër të ftuarit për të diskutuar në një panel nga Fondacioni Friedrich Ebert në lidhje me zhvillimet në rajon dhe situatën politike në Shqipëri. Vetë Rama ka postuar disa foto nga aktiviteti i djeshëm në Berlin. “Dje në Berlin i ftuar nga Fondacioni Friedrich Ebert si folës në ‘Eminent Lectures’ për Shqipërinë dhe vendosmërinë tonë në rrugën e reformave europianizuese, për negociatat dhe reformën në drejtësi; si edhe për zhvillimet në rajon e për nevojen që Europa ka për Ballkanin”, shkruan Rama.
ma.me
