Ministri i Brendshëm italian, Marco Minniti ka nisur zyrtarisht vizitën në Tiranë. I shoqëruar nga ambasadori italian, Alberto Cutillo, takimin e parë ai e ka pasur me homologun e tij, Fatmir Xhafaj, ndërsa më pas mbërriti në Presidencë te Meta.
Por paralelisht me takimin Minniti-Meta, bashkëshortja e presidentit ka mbledhur kryesinë e partisë që drejton duke vijuar akuzat ndaj qeverisë.
Monika Kryemadhi u shpreh sot se “Rama po hedh vallen sipas orkestrës së krimit”.
“Kryeministri Edi Rama është kthyer në mburojë të krimit dhe drogës. Rama vendosi të mbronte drurin e shtrembër të tij. Në zgjedhjet e 25 qershorit LSI pati rritje. Shqipëria është zhytur në një realitet të trishtë ku dominon krimi dhe droga. Varfëria dhe mjerimi po i nxjerrin bojën qeverisë së fasadave të bojës” – tha sot Kryemadhi.
Ditën e sotme, ministri i Brendshëm i Italisë pritet të marrë pjesë në raportin vjetor të monitorimit nga ajri, një bashkëpunim ky mes Guardia di Finanza dhe Policisë Shqiptare.
Të dhënat paraprake nga ky raport, të publikuara në media, tregojnë se sipas Guardia di Finanzas, në muajt e fundit avionët italiane kanë fotografuar vetëm 1 përqind të parcelave me kanabis që u zbuluan një vit më parë. /JavaNews/b.d
