Këtë të Martë po mbahet në kryeqytet ministeriali euro-ballkanik, ku po marrin pjesë të gjithë ministrat e Ekonomisë të vendeve të rajonit dhe të BE-së.
I pranishëm në këtë mbledhje të rëndësishme, kryeministri Edi Rama tha se interesi i Bashkimit Europian për Ballkanin Perëndimor është rritur ndjeshëm.
“Tashmë po shohim të marrim frytet, sepse pema është pjekur mjaftueshëm. Besoj fort se në këtë moment mjaft përcaktues për Evropën në vlerat e komunitetit të përbashkët, ka ardhur koha të mendojmë jashtë kornizave dhe është pikërisht kjo gjë ajo që po përpiqemi të bëjmë me këtë samit me miqtë tanë të mëdhenj të BE-së. Dje zhvillova një bisedë mjaft shteruese me mikun tonë nga qeveria e Francës, gjë që 5 vjet më parë do të ishte e pamundur. Gjërat kanë ndryshuar, ne e shohim me mjaft interes se në BE ka një bindje më të fortë dhe janë më syhapur karshi rëndësisë që BP ka për Europën.”
Ai theksoi se rëndësia e këtij takimi qëndron në planin e ardhëm të BE-së për rajonin tonë, në aspektin ekonomik.
“Jemi këtu me ministra e zyrtarë të shquar nga vendet e Ballkanit Perëndimor dhe nga BE për të diskutuar rreth temave më thelbësore të këtij procesi që përfshin forcimin e ekonomive tona duke përfshirë lidhjet me sferën e aktiviteteve ekonomike me BE. Samiti do duhet të diskutojë për diçka krejt të re, plani i ardhshëm i BE për të mbështetur BP duke u hapur në disa mënyra që do na sjellin më pranë. Kemi pritshmëri të larta për planin e premtuar që me kaq padurim po e presim. Integrimi me faza në tregun e përbashkët premton të na japë një ide të vyer për rritjen ekonomike të rajonit në vitet në vijim. Është koha për të ecur sëbashku përpara dhe për t’u siguruar që të shohim vepra premtuese.
Mund ende të kemi çështje të rëndësishme të pambyllura, por përmes këtij procesi e kemi mësuar që e vetmja mënyrë është të përpiqemi të biem sa më shumë dakord dhe të bëjmë sa më shumë gjëra sëbashku. Besoj se sa më e mirë atmosfera e bashkëpunimit, urat që ndërtojmë midis vendeve tona, aq më e mirë është edhe hapësira edhe për të trajtuar çështjet më të vështira. Dua të falenderoj me zemër dhomat e përfshira në këtë proces: Unionin e Dhomave të Tregtisë të Ballkanit Perëndimor që ka ndihmuar shumë qeveritë.”
Sipas kreut të qeverisë janë rreth 6 mijë shoqëri tregtare të rajonit që kanë përfituar nga aktivitetet e përbashkëta ekonomike mes vendeve.
“Një prej të dhënave më domethënëse që dua të ndaj me ju është se 6 mijë shoqëri tregtare në rajon kanë përfituar nga aktivitetet e nxitjes së tregtisë, nga heqjet e barrierave jo tarifore nga panairet, ngjarjet e përbashkëta të cilat kanë përfshirë shoqëritë tregtare sidomos mbështetjen për qasjet me fondet në raport me tregun. Dua të citoj pa leje mikun e dashur francez që kemi këtu i cili dje më kujtoi diçka tejet thelbësore që s’mund të harrohet, ajo që po ndërtojmë këtu nuk është diçka e re, por mbështetet në shembullin franko-gjerman.
Ai më tha se ai është me origjinë nga Alsasa, një nga betejat më të përgjakshme në konfliktin e gjatë mes Francës e Gjermanisë dhe se gjyshërit e tij e kanë parë me sytë e tyre, nga këto kujtesa të tmerrshme të luftës, Franca vendosi t’i shtrijë dorën bashkëpunimit Gjermanisë. Fjala u përhap për këtë gjest kaq të guximshëm asokohe dhe i hapi rrugë Evropës që kemi, që brezat të mos shihnin luftë. Është thelbësore të mos e shohim luftën si një video-game, por si një katastrofë që duhet shmangur në çdo formë.”
/a.r
