Pas takimit të mbajtur në Beograd ku u diskutua Minishengeni i Ballkanit Perëndimor, një tjetër takim mes tre liderëve do të mbahet në Ohër këtë të shtunë, ashtu sikundër ishte edhe paralajmëruar më herët. Kryeministri Edi Rama, ai i Maqedonisë së veriut, Zoran Zaev dhe Presidenti i Serbisë, Aleksandër Vuçiç, do të takohen sërish në Ohër këtë pasdite, konkretisht në orën 17:30.
Në takimin e parë u diskutua për mundësitë e lëvizjes së lirë të qytetarëve brenda vendeve të Ballkanit Perëndimor, duke e konsideruar këtë një minishengen. Po kështu është diskutuar edhe për lehtësirat e tregtisë dhe shkëmbimet mes vendeve si dhe për taksat.
Por pavarësisht asaj se çfarë u tha dhe konkluzioneve që dolën nga takimi i parë, minishengeni i Ballkanit Perëndimor është kritikuar shumë si nga vendet që nuk u ftuan ashtu edhe nga ato të BE, madje edhe SHBA. Të gjithë ishin pothuaj të një mendimi se në këtë minishengen duhej të ishte pjesë e takimit edhe Kosova dhe Mali i Zi. Ndërkohë nuk dihet arsyeja pse këto vende u lanë jashtë këtij takimi trepalësh mes Ramës-Vuçiçit dhe Zaevit.
