Minë me telekomandë dhe lëndë narkotike janë sekuestruar ditën e sotme nga policia e Elbasanit. Ndërkohë lidhurme ngjarjen policia e Elbasanit ka arrestuar një person të identifikuar me inicialet A.R.
Zbulimi i eksplozivit dhe 7 kg të lëndës narkotike u bë me metoda speciale policore që u përdorën në operacionin të koduar “Zaranika”.
Ndërkohë policia po punon dhe për identifikimin e personave të tjerë që janë të përfshirë në aktivitetin e shtetasit A.R.
Njoftimi i policisë
Në vijim të punës për parandalimin dhe goditjen e personave që tentojnë të trafikojnë lëndë narkotike apo lëndë plasëse, mbi bazën e informacioneve të marra në rrugë operative, pas një hetimi me metoda speciale, Specialistët e Seksionit për Hetimin e Narkotikëve dhe Trafiqeve të Paligjshme kanë organizuar dhe finalizuar operacionin policor të koduar “Zaranika”, ku u arrestua në flagrancë shtetasi A.R.
Shërbimet e Policisë gjatë kontrollit të ushtruar në qytetin e Elbasanit i kanë gjetur këtij shtetasi 1 minë me telekomandë, si dhe rreth 7 kg lëndë narkotike e llojit kanabis, të cilat u sekuestruan në cilësinë e provës materiale.
Në bashkëpunim me Prokurorinë vijon puna për zbardhjen e plotë të këtij rasti, identifikimin dhe kapjen e personave të tjerë të implikuar. Materialet në ngarkim të tij i kaluan Prokurorisë pranë Gjykatës së Shkallës Parë Elbasan për veprat penale të “Prodhimi dhe mbajta pa leje e armëve luftarake dhe e municionit” dhe “Prodhimi dhe shitja e narkotikëve”.
