JAVANEWS/ “Rezultat troditës”. Kështu e ka përkufizuar ish- ministri i Jashtëm, Paskal Milo, rezultatin e referendumit britanik, i cili vendosi që Britania e Madhe të dalë jashtë Bashkimit Europian. Në një prononcim për Javanews, Milo shprehet se ky vendim është tronditës jo vetëm në aspektin e brendshëm për Britaninë, por edhe në skenën europiane dhe atë botërore.
“Në aspektin e brendshëm referendumi nxorri në pah ndasitë e thella brenda për brenda Britanisë. Disa shtete kanë tendenca shkëputje. Ky është një problem jo i vogël me të cilin ata duhet të përballet tani. Në aspektin Europian, projekti i një Europe të Bashkuar ka marrë një goditje jo të vogël. Ëndërra europiane duket se ka filluar të bëhet zhgënjyese. Vetë rezultati i referendumit është një mesazh inkurajimi për euroskeptikët nga njëra anë, por nga ana tjetër edhe një sinjal jo i duhur që shkon në favor të forcave ekstremiste dhe të së djathtës ekstreme që janë kundër BE-së”, shprehet Milo.
Për ish- shefin e diplomacisë shqiptare, efektet e referendumit kanë ndikim edhe në planin ndërkombëtarë pasi dalja e Britanisë nga BE-ja dobëson pozitën e vetë Bashkimit Europian. Milo nga ana tjetër nënvizon se këto efekte politike natyrshëm do të shoqërohen edhe me efekte ekonomike dhe financiare, të cilat, sipas tij, do të jenë dramatike.
Por a ndalet deri këtu “JO”-ja e britanikëve ndaj BE-së? Ish- ministri i jashtëm parashikon se ky vendim do të ketë efekte frenuese edhe ndaj procesit të zgjerimit të BE-së. Sipas tij, tani edhe për Shqipërinë, por edhe për vendet e tjera të rajonit, gjërat do të bëhen më të vështira, pasi edhe vetë BE-ja është në udhëkryq për të ardhmen e saj.
“Gjermania dhe Franca duhet të marrin rolin e lidershipit për të shpëtuar projektin e një Europe të Bashkuar. Duhet një reflektim i thellë brenda vetë BE-së, në mënyrë që të mos vihet në pikëpyetje Unioni”, nënvizon Milo.
(javanews.al) Me. Ar
