Presidenti amerikan Donald Trump deklaroi se “nuk ndihet optimist” për fatin e aktivistit të burgosur pro-demokracisë, Jimmy Lai, pas një bisede me presidentin kinez Xi Jinping. Sipas Trump, çështja e Lai-t është një nga temat më të vështira për t’u zgjidhur në marrëdhëniet aktuale mes SHBA-ve dhe Kinës.
Gjatë kthimit nga një vizitë dyditore në Kinë, Trump tha se kishte ngritur çështjen e Lai-t me Xi Jinping, por përgjigjja që mori nuk ishte pozitive. Ai deklaroi se udhëheqësi kinez e kishte përshkruar çështjen si “të vështirë”, duke lënë të kuptohet se nuk ka shumë hapësirë për një zgjidhje të shpejtë. Sipas Trump, kjo e ka bërë atë të mos ndihet optimist për një lirimin e afërt të miliarderit.
Në një intervistë për Fox, Trump përsëriti se kishte diskutuar rastin e Lai-t dhe se reagimi nga pala kineze nuk kishte qenë inkurajues. Ai theksoi se kishte përmendur më parë edhe raste të tjera të të burgosurve në Kinë, përfshirë një pastor të krishterë, për të cilin kishte marrë sinjale më pozitive nga Pekini, por jo për Lain.
Jimmy Lai, një figurë e njohur e medias dhe mbështetës i fuqishëm i lëvizjes pro-demokracisë në Hong Kong, u arrestua në vitin 2020 gjatë një goditjeje të gjerë ndaj aktivistëve pas protestave masive antiqeveritare. Në shkurt, ai u dënua me 20 vjet burgim sipas ligjit të sigurisë kombëtare të vendosur nga Pekini.
Familja e tij ka shprehur vazhdimisht shqetësim për gjendjen shëndetësore të Lai-t, duke thënë se ai vuan nga diabeti dhe po mbahet në kushte të rënda izolimi. Sipas deklarimeve të tyre, ai ka humbur ndjeshëm peshë dhe ka shfaqur përkeqësim të dukshëm fizik gjatë qëndrimit në burg. Ata kanë ngritur gjithashtu shqetësime për temperaturat ekstreme në qelitë ku ai mbahet dhe mungesën e kushteve bazë.
Vajza e tij, Claire Lai, ka falënderuar publikisht Trump për përpjekjet e tij për të ngritur çështjen e babait të saj me autoritetet kineze, duke shprehur shpresën se ndërhyrja ndërkombëtare mund të sjellë një ndryshim. Ajo ka thënë se lirimi i tij do të ishte “veprimi i drejtë dhe i ndershëm” që mund të ndërmerret nga Pekini.
