Një ngjarje e rëndë është shënuar sot në një familje shqiptare në territorin e provincës së Milanos. Një grindje për motive banale degjeneroi në një sherr të dhunshëm mes një çifti emigrantësh shqiptar.
Ngjarja ndodhi rreth orës 9.30 të mëngjesit të sotëm në komunën Paullo në jug-lindje të provincës së Milanos.
Bashkëshorti 68 vjeçar goditi me çekiç në kokë bashkëshorten e tij 65 vjeç. Ajo ndodhet në gjendje të rëndë e në rrezik për jetën në spitalin Niguarda të Milanos.
Pasi ka goditur dhunshëm bashkëshorten 68 vjeçari shqiptari ka goditur me çekiç në kokë vetveten duke tentuar vetëvrasjen. Ka qenë një 77 vjeçare italiane, fqinj e familjes shqiptare e cila ka tentuar të ndal dhunën e tij e të lajmërojë forcat e rendit.
68 vjeçari ndodhet në spitalin San Raffaele të Milanos, aktualisht në gjendje kome.
Mësohet se vetëm pak kohë më parë 68-vjeçari shqiptar kishte humbur vendin e punës.
Ndaj tij është lëshuar urdhri i arrestit me burg me akuzën e tentativës së vrasjes për motive të dobëta.
