Milani përfitoi nga barazimi i Interit dhe mundi Xhenoan 1-0 në “Marassi”, duke marrë kryesimin pas tetë javësh në Serie A.
Ndeshja u vendos nga Pulisic, i cili në minutën e 87 realizoi golin e vetëm, duke zgjidhur një sfidë të komplikuar për skuadrën e Piolit.
Fundi i ndeshjes dhuroi të tjera emocione, ndërsa u përjashtuan nga loja të dy portierët.
Zhirud nga sulmi u vendos në portë, pasi te kuqezinjtë ishin kryer të gjitha zëvendësimet.
Në fund të takimit, trajneri Pioli tha se kjo ishte një ndeshje ku Milani pati shumë ngarkesë, por ia doli falë meritës së lojtarëve.
“Ishte një ndeshje e veçantë ku ne luftuam, por edhe besuam te suksesi. Meritë e madhe për lojtarët që e përfunduan këtë periudhë në mënyrën më të mirë të mundshme, duke u shfaqur në ndeshje me mentalitet dhe dëshirë për të fituar. Më gëzon dëshira e këtij grupi.”
Ndërsa sa i përket Zhirudit portier, ai u shpreh se ajo që ai bëri është pjesë e mentalitetit të Milanit.
Vetë francezi deklaroi pas takimit se kurrë nuk kishte përjetuar diçka të tillë.
“Djalli” shkon në kuotën e 21 pikëve, 2 më shumë se sa Interi.
/a.d