Qindra njerëz kanë mbetur të bllokuar përtej lumit në luginën Manoor të provincës Khyber Pakhtunkhëa në Pakistan. Përmbytjet shkatërruan të paktën 10 ura dhe dhjetëra ndërtesa.
“Ne kemi nevojë për furnizime, kemi nevojë për ilaçe dhe ju lutemi rindërtoni urën, ne kemi mbetur pa asgjë”, shkruan në një shënim me dorë banorët.
Lugina Manoor ndodhet në malet e Kaghan, një destinacion i famshëm turistik në Pakistan. Lugina u përmbyt dhe humbën jetën të paktën 15 njerëz, përfshirë gra dhe fëmijë.
Përmbytjet shkatërruan të vetmen urë betoni që lidh luginën piktoreske me qytetin kryesor. Të gjitha fshatrat në anën tjetër të lumit janë bllokuar dhe banorët presin ndihmë.
Në Manoor janë shembur plotësisht dy ura dhe është ngritur një kalim i përkohshëm prej druri, sipas BBC.
“Shtëpia ime dhe fëmijët e mi janë në anën tjetër të lumit. Kam dy ditë që pres këtu duke menduar se qeveria do të vijë dhe të riparojë urën. Por autoritetet po na thonë se duhet të fillojmë të ecim në anën tjetër të malit për të shkuar në shtëpi, që do të thotë se duhet të ecim 8 deri në 10 orë. Unë jam një grua e vjetër. Si mund të eci kaq shumë?”, tha një banore për BBC.
Ndërkohë në një letër që banorët i dhanë ekipit të medias prestigjioze, shkruhej: “Shumë njerëz janë të sëmurë dhe nuk mund të largohen nga fshati në këmbë. Ju lutemi ndërtoni urën, është lidhja kryesore me qytetin. Ne kemi nevojë për furnizime. Ne kemi nevojë për një rrugë.”
“Ka shumë persona të tjerë që kanë humbur pasurinë dhe burimet e të ardhurave”, thotë një banor. “Ata kanë nevojë për ndihmë. Ata kanë nevojë për ushqim. Këtu ishte një treg i vogël i cili u shkatërrua. Dyqanet kishin të gjitha ushqimet dhe furnizimet. Autoritete dhe politikanë vijnë këtu për foto dhe për tu argëtuar. Ata vijnë, bëjnë foto dhe ikin. Askush nuk na ndihmon.”
Ndërsa qeveria fajëson ndryshimet klimatike për përmbytjet, komunitetet kritikojnë qeverinë dhe autoritetet lokale për lejimin e ndërtuesve të ndërtojnë hotele në brigjet e lumit.
“Këto hotele dhe tregje bllokuan rrugët ujore. Jemi dëshmitarë të humbjeve shumë më të mëdha për shkak të përmbytjeve të cilat mund të shmangeshin lehtësisht”, thotë një tjetër banor.
Shumë hotele janë ndërtuar në brigjet e lumit Kunhar në Kaghan dhe në luginat ngjitur. Përmbytjet kanë shkatërruar disa prej tyre, së bashku me një stacion policie dhe një shkollë fetare.
Shirat e dendur dhe përmbytjet po bëjnë “kërdinë” në të gjithë Pakistanin.
Më shumë se 1061 njerëz janë vrarë ndërsa miliona janë zhvendosur. Zyrtarët thonë se të paktën 700,000 shtëpi janë shkatërruar. 800,000 hektarë tokë bujqësore janë përmbytur, si dhe 3,400 kilometra rrugë dhe 157 ura.
