Ditën e sotme Presidenti ukrainas Volodymyr Zelensky tha se mijëra civilë mbeten të bllokuar brenda Mariupolit, ndërsa e krahasoi rrethimin rus me një “operacion terrorist”.
Komandantët ukrainas në terren kanë thënë se forcat ruse nuk i kanë respektuar marrëveshjet për të hapur korridoret e evakuimit apo për të zbatuar armëpushimet dhe kanë vazhduar të bombardojnë qytetin.
Mariupol është shkatërruar pothuajse plotësisht nga bombardimet ruse me javë të tëra. Dhjetëra mijëra civilë ende presin evakuimin, sipas zyrtarëve ukrainas.
Pas përpjekjeve të shumta të dështuara për të krijuar korridore të sigurta jashtë Mariupolit, katër autobusë evakuimi arritën të largoheshin nga qyteti të mërkurën.
Në një intervistë për kanalin televiziv francez BFMTV, Zelensky tha: “Përsa i përket ushtrisë sonë, forcat e Federatës Ruse nuk na lejojnë të kalojmë nëpër këto 120 kilometra të pushtuara që të arrijmë sot në zhbllokimin ushtarak të Mariupolit. Është e vërtetë. Nuk mund ta bëjmë sot. Ne duhet të negociojmë dhe të hapim korridoret humanitare. Por mijëra që ju thashë janë të bllokuar atje dhe Rusia deri më tani nuk po i lejon këta njerëz të dalin nga robëria”.
/a.r
