Mihal Delijorgji është rikthyer sërish në skenë, pas një leje që ai ka marrë për ndërtimin e një pallati në Tiranë.

Qeveria nxitoi të deklaronte, se leja atij i është dhënë në kohën e Lulzim Bashës.

PD nga ana tjetër e mohon këtë gjë, duke thënë se lejen ia ka dhënë Rama.

Shqiptarja.com ka bërë një shkrim, ku tregon gjithë ulje-ngritjet e Delijorgjit.

***

Mihal Delijorgji, ekskavatoristi që bëri miliona nga tregtia e skrapit, arriti që të blinte një tank me 300 mijë lekë, për të futur më pas në dorë tërë metalet e Ministrisë së Mbrojtjes dhe drejtuesit më të lartë të qeverisë, politikës dhe të medieve në disa raste.

Si nisi shkëlqimi i minoritarit që e nisi me shitjen e hekurit për të arritur tek punishtja e Gërdecit që shkaktoi 26 viktima të pafajshme, mbi 300 të plagosur dhe që implikoi që nga kryeministri Berisha e djali i tij Shkëlzen, ministri Mbrojtjes Mediu, tërë stafin e qeverisë dhe që nuk ndalet as pas daljes nga burgu, duke marrë leje ndërtimi nga qeveritë dhe para nga shteti.

Si nisi biznesi i Mihal Delijorgjit, minoritarit ekskavatorist?

Një i ri minoritar me arsim 8-vjeçar, me një kurs mekanizatori, nga Dropulli do ndiqte hapat e babait, duke punuar me ekskavator në vendlindje. Rënia e diktaturës dhe hapja e kufijve do e shkëpusnin Delijorgjin nga ekskavatori, për ta çuar në Greqi, si shumë bashkëmoshatarë të zonës. Pas më pak se 2 vitesh emigrim, ai u rikthye në Shqipëri dhe nisi biznesin e hekurit. Fillimet rezultuan të suksesshme, sepse Shqipëria kishte nevojë për hekur për ndërtim.

Ylli i Delijorgjit do ngjitej në vitin 2000, kur në dorë i ra një pasuri përrallore, mijëra tonelata metale të shtrenjta, të harruara në depot e ushtrisë së shkatërruar të vendit. Shoqëria “Përparimi sh.a.” e tij arriti më 2004 të siguronte një kontratë për demontimin e tankeve dhe autoblindave të ushtrisë, duke nisur një biznes prej miliona USD që përfundoi në mënyrë të tmerrshme më 15 mars në Gërdec.

Në atë periudhë, një tank shitej te kjo firmë private vetëm me 300 mijë lekë, ndërkohë që një tank rus peshonte nga 32 deri në 35 tonë, ndërsa një tank kinez peshonte më shumë se 36 tonë e në përbërje të tyre, kishte pjesë dhe pajisje çeliku special, gize, bakri dhe bronzi.

Dosja e SHIK-ut për Mihal Delijorgjin, pse dyshohej…?

Biznesmeni që “mbolli” tragjedinë e Gërdecit, në bashkëpunim me shtetin, Mihal Delijorgji, ka qenë nën vëzhgim nga SHIK në vitet ‘90. Ai dyshohej se në bashkëpunim me ish-shefin e SHIU-t, një inxhinier lokacioni, ka ndërmjetësuar për shitjen në një firmë izraelite të raketave të krahut Stinger Hand-held SAM, patentë amerikane, të blera në Pakistan pas vizitës nga gjeneral A.Baruti më 1996.

Njeriu që siguroi monopolin në importin e hekurit në vend, pas vrasjes së pazbardhur të biznesmenit Florian Vila, filloi të ngjitej në biznes. Vitet do ndryshonin rrugën e import-eksporteve të Delijorgjit, që do përzgjidhte transportin detar të hekurit. Ashtu si depozitat e karburanteve në Portin Detar të Durrësit, siguron me emfiteozë ambientet e NSHRAK në Shkozet, ku vendos aktivitetin e firmës së tij “Përparimi sh.a. Mbi 15 mijë metra2 tokë, dhënë kundrejt qirasë simbolike ku ngriti fabrikën për prodhim të skarave, rrjetave metalike, llamarinave etj.

A ka pasur akuza për pastrim parash, madje dhe është arrestuar?

Dyshohet se ka llogari bankare përveçse në Shqipëri, Greqi dhe Qipro, edhe në banka të tipit “offshore”. Dyshohet se Delijorgji ka bërë pagesa me “sëift” e letra të parevokueshme krediti nga banka qipriote, në ishullin Nauru në Oqeanin Paqësor. Në tetor 2002, u bë sponsori kryesor i klubit të futbollit “Dinamo”.

Më 25 prill 2004 u arrestua nga agjentët e antikrimit të Policisë së Durrësit, për kontrabandë e falsifikim të dokumenteve shoqëruese të hekurit të importuar. Evazioni fiskal i shkaktuar shtetit u vlerësua një milion dollarë. Ai kishte përdorur metodën e njohur me emrin “triangolacion” (trekëndëshi). Përmes garancisë pasurore del në liri, ku 1.2 milionë USD u cilësuan shumë atë kohë.

Po më pas, pati pengesë biznesi i minoritarit…?

Mihal Delijorgji do të pushtonte tërë “industrinë” e demontimit të materialeve ushtarake, përmes kontratave të majme, me qeveritë shqiptare, derisa më 15 mars 2008 ti shpërthente punishtja e vdekjes në Gërdec duke shkaktuar 26 të vrarë e 300 të plagosur.

Telefonatat e asaj kohe me ish-ministrin e Mbrojtjes Mediu dhe djalin e ish-kryeministri Berisha, Shkëlzen janë zbardhur, çka tregon involvimin në këtë tregti vdekjeje të tërë shtetit. Dhe dënimi ishte qesharak, vetëm pak vite në burg duke dalë jashtë dyerve të tij, duke marrë mbi 15 mijë euro nga Strasburgu, dhe duke marrë leje ndertimi nga qeveria Berisha në ikje por dhe tani nga qeveria Rama, dhe vijuar aktivitetin ndërtimor pa shqetësim.