Reshjet me intensitet të lartë dhe moti i keq i orëve të fundit kanë shkaktuar problematika në disa zona të vendit, ndërsa strukturat qendrore dhe lokale kanë vijuar punën në terren pa ndërprerje për të normalizuar situatën.
Ministria e Infrastrukturës dhe Energjisë njoftoi se ndërhyrjet kanë qenë të vazhdueshme për pastrimin e akseve rrugore, garantimin e furnizimit me energji dhe mbajtjen funksionale të infrastrukturës së ujësjellës-kanalizimeve.
“ARRSH, OSSH, AKUK dhe të gjitha agjencitë e tjera, me kapacitete të shtuara dhe mjete të specializuara, po vijojnë punën në territor, pavarësisht kushteve të rënduara atmosferike,” thuhet në njoftimin zyrtar.
Situata më problematike është regjistruar në zonat e Gjirokastrës, Sarandës dhe Tropojës, ku reshjet kanë sjellë prurje uji, inerte dhe dëmtime në disa segmente rrugore.
Ministria bëri të ditur se kontraktorët kanë qenë në terren pa ndërprerje për pastrimin e akseve, ndërsa qarkullimi në të gjitha rrugët kombëtare vijon normalisht, përveç aksit Kranë–Muzinë, i cili është bllokuar nga përmbytja e lumit Bistrica.
Edhe furnizimi me energji elektrike ka pësuar ndërprerje në disa zona, por sipas Ministrisë, energjia është rikthyer në veri falë vendosjes në punë të dy linjave 35kV në Koplik dhe Velipojë. “Aktualisht janë 36 fidera jashtë pune, për të cilat janë marrë masat për zgjidhjen e defektit. Në jug, Nënstacioni Bunec ka pësuar avari për shkak të linjës 35kV që vjen nga Saranda. OSSH është në gatishmëri të plotë me bazë materiale dhe staf të dedikuar për emergjencat,” theksohet në raport.
Në sistemin e transmetimit janë shënuar disa stakime linjash për shkak të shkarkimeve atmosferike, por linjat janë rikthyer në punë brenda pak minutash pa prekur konsumatorët. Ministria sqaroi se “aktualisht nuk ka defekte ose avari në elementët e Sistemit të Transmetimit të OST dhe të gjitha brigadat janë në gatishmëri.”
Sa i përket furnizimit me ujë të pijshëm, stacionet e pompimit janë në gjendje pune dhe burimet me gravitet janë monitoruar për turbullira e ndotje. Ministria njoftoi se “janë marrë masat konform kushteve higjeno-sanitare që të bëhet pastrimi dhe klorinimi deri në sigurimin e kushteve për furnizim të banorëve. Nuk ka pasur asnjë rast të ndërprerjes së furnizimit me ujë.”
Situata në portet dhe aeroportin e Tiranës paraqitet e qetë. Në Portin e Durrësit tragetet kanë mbërritur në orar dhe operacionet vijojnë normalisht, ndërsa në Portin e Sarandës tragetet e linjës së Korfuzit janë nisur pa vonesa. Edhe Aeroporti Ndërkombëtar “Nënë Tereza” ka operuar pa ndërprerje.
Ministria e Infrastrukturës dhe Energjisë konfirmoi se situata është në monitorim të vazhdueshëm dhe grupet e punës po punojnë pandërprerje për t’ju përgjigjur çdo problematike, me fokus garantimin e qarkullimit të mjeteve në të gjitha akset rrugore të vendit, si dhe sigurimin e furnizimit me energji dhe ujë të pijshëm për të gjithë abonentët.
