Pas luftës, ende të pambyllur, midis Apple e FBI, hapet një tjetër, ajo midis Microsoft dhe Departamentit të Drejtësisë (DOJ). Zgjerohet fronti që vë përballë gjigantët e ekonomisë dixhitale dhe Administratën Obama, me një temë të vetme në qendër: Gjetjen e ekulibrit për të drejtën e privatësisë nga njëra anë dhe sigurinë kombëtare e luftën kundër terrorizmit e krimit nga ana tjetër.
Microsoft ka zbritur në fushë sot, duke paditur DOJ. Dosja voluminoze e paraqitur nga kompania e Bill Gates denoncon frekuncën në rritje me të cilën policia dhe autoritetet gjyqësore kërkojnë të fusin duart në të dhënat “tona”: email e të tjera. Për më tepër, kërkohet edhe që përdoruesi të mos njoftohet që të dhënat e tij personale i janë nënshtruar hetimit.
Fashikulli i prezantuar nga juristët e Microsoft është i pasur me shifra. Vetëm në një vit e gjysmë të fundit, kompania me qendër në Seattle ka marrë 5.624 kërkesa aksesi në të dhënat e klientëve të saj nga autoritetet federale (kryesisht FBI). Nga këto, pothuajse gjysma, 2.576, shoqërohej me kërkesën e mëtejshme që klienti të mos njoftohej për “kontrollin dixhital”.
Futja në luftë e Microsoft konfirmon se po bëhet kompakt fronti i kompanive hi-tech. Rasti i mëparshëm më i bujshëm ishte kërkesa e FBI për Apple për zhbllokimin e smartphone-t të përdorur nga terroristët në San Bernardino në dhjetor. Ajo betejë përfundoi kur DOJ gjeti tjetër mënyrë për të penetruar në smartphone, me ndihmën e një hackeri.
Në fillim, Bill Gates mbajti distancë nga pozicioni Apple, që kundërshtonte me vendosmëri kërkesat e FBI. Tani Microsoft vendos të shtrëngojë radhët me të mëdhenjtë e tjerë të industrisë teknologjike.
