Publiku i ceremonisë së 78-të të çmimeve Emmy e priti Michael J. Fox me ovacione në këmbë, në një nga çastet më emocionuese të mbrëmjes. Aktori foli për përvojën e tij me Parkinsonin dhe përcolli një mesazh të fortë shprese për miliona njerëz që jetojnë me këtë sëmundje.
Fox, 65 vjeç, u ngjit në skenë të hënën, më 14 shtator, për të marrë Çmimin Humanitar Bob Hope. Vlerësimi iu dha për përpjekjet e tij në mbështetje të kërkimit shkencor dhe për rritjen e ndërgjegjësimit rreth Parkinsonit.
Aktori, fitues i pesë çmimeve Emmy, u prezantua nga Julianna Margulies, bashkëpunëtorja e tij në serialin “The Good Wife”. Në fjalët e para, ai e falënderoi Akademinë e Televizionit, duke e përshkruar çmimin si një “nder të jashtëzakonshëm”.
Gjatë fjalimit, Fox iu referua edhe Bob Hope, emrin e të cilit mban çmimi, dhe ndikimit që pati artisti në rrugëtimin e tij personal.
“E mësova nga shembulli i tij. Nuk mund ta dija se sa shumë do të ndikonin këto mësime në jetën time deri në fund të të 20-tave, kur fati më rezervoi një rol që nuk e doja”, tha ai, duke folur për periudhën kur u përball me diagnozën e Parkinsonit.
Aktori rrëfeu se fillimisht zgjodhi ta fshihte sëmundjen. Sipas tij, frika ishte se diagnoza mund të dëmtonte karrierën dhe mënyrën se si publiku e shihte atë.
Megjithatë, vendimi për ta bërë publike gjendjen shëndetësore i solli një reagim që ai nuk e kishte parashikuar: mbështetje të gjerë nga njerëzit.
“U habita nga mbështetja e të gjithëve ju. U ndjeva kaq i fortë dhe kuptova se nuk e kisha humbur atë që po bëja. Ata nuk mund të ma hiqnin. Dhe kjo për shkak të mbështetjes suaj”, u shpreh Fox.
Ai nënvizoi se të pranosh një diagnozë nuk do të thotë të heqësh dorë përballë saj.
“E kuptova se pranimi i sëmundjes së Parkinsonit nuk do të thoshte se duhej t’i dorëzohesha asaj. Do të thoshte se duhej të bëja atë që mundesha për të gjithë ata që jetojnë me këtë sëmundje”, tha aktori.
Michael J. Fox u diagnostikua me Parkinson në vitin 1991, në moshën 29-vjeçare, ndërsa vendosi ta bënte publike diagnozën në vitin 1998.
Pas kësaj, ai nisi një fushatë të gjerë për të mbështetur kërkimet shkencore dhe për të mbledhur fonde me synimin e gjetjes së trajtimeve për sëmundjen.
“Fillova me qëllimin për të luftuar për sëmundjen dhe për të mbledhur para. Gjeta njerëz për të udhëhequr këtë përpjekje në emrin tim dhe premtova të financoja kërkimin më të mirë shkencor në botë”, tregoi Fox.
Aktori tha se ndihet krenar për përparimin e arritur deri tani në fushën e kërkimit për Parkinsonin, duke theksuar se objektivi përfundimtar mbetet zhdukja e sëmundjes.
“Jam krenar për progresin që kemi bërë në dobi të pacientëve me Parkinson dhe familjeve të tyre. Po i afrohemi gjithnjë e më shumë eliminimit përfundimtar të kësaj sëmundjeje. Jam thellësisht mirënjohës ndaj stafit tonë, donatorëve, studiuesve dhe mbi të gjitha, komunitetit të pacientëve që e bëjnë të mundur punën tonë në fondacion”, deklaroi ai.
Në mbyllje, Fox shprehu mirënjohjen për familjen e tij dhe për Bob Hope, duke thënë se të dy “i treguan rrugën”.
Përveç nderimit humanitar, Michael J. Fox ishte i nominuar edhe si aktori më i mirë i ftuar në një serial komedi për interpretimin në “Shrinking”. Trofeu i kësaj kategorie iu dha Rob Reiner, disa muaj pas vdekjes së tij.
